Archivos de la categoría Azkarrak

Errenteriako Fomento Cultural garaile Eibarko Hiria 33. txapelketan

Larunbatean, uztailaren 1ean jokatu zen Jose Mari Kruzetaren omenezko Eibarko Hiria 33. partida azkarren xake txapelketa Euskal Herri guztitik etorritako 14 talderen partehartzearekin. Eguraldia zela-eta, partidak Udaletxearen arkupeetan jokatu genituen eta lau bat orduz xakea eta laguntasuna izan ziren aurtengo txapelketaren ezaugarri bertaratutako 70 jokalarien artean.

 

Jon Arana (Eibar) vs. Txus Agirretxe (Fomento Cultural)

Arratsaldea aurrera joan ahala ikusle asko agertu zen bertara, hiri erdian egonda xakea erakustarazteko leku ederra dela erakutsiz.

 

Klub Deportiboak bi talde aurkeztu zituen, baten Jon Arana, David Pérez, José Ricardo Gómez, José Antonio Garrido eta Emilio José Freire aritu ziren, bigarrenean Xabier Beorlegui, Adrian Martinikorena, Lander Aja eta Aitor Beorlegui.

 

Arratsalde guztiko 13 partiden ostean, Errenteriako Fomento Cultural gailendu zen 42 punturekin, Donostiako Easoren aurretik, 41,5 puntu lortu zituzten donostiarrek, eta Gros Xake Taldearen aurretik, hauek 35,5 puntu lortu zituzten. Eibarko taldeei dagokienez, Deportiboko A taldeak 7. postua lortu zuen 27 punturekin eta B taldeak 13.a 8,5 puntu lortuta.

Mahai bakoitzeko jokalari onenen sariak jokalari hauentzat izan ziren:

  • 1. mahaia: Luis Olaizola (Gros Xake Taldea): 10,5 puntu
  • 2. mahaia: Juan Carlos Lakunza (Easo): 11 puntu
  • 3. mahaia: Oscar Diez (Izeaga): 13 puntu (partida guztiak irabazita)
  • 4. mahaia: Iñigo Galarza (Fomento Cultural): 13 puntu  (partida guztiak irabazita)

 

Txapelketa bukatuta egin zen sari banaketan Patxi Lejardi Eibarko Udaleko kultura eta euskara zinegotzia, eta Margari Olañeta Jose Mari Kruzetaren alarguna izan ziren.

Saritu guztiak

Sari banaketaren ostean, laguntasun afarian hartu genuen parte guztiok Eibarko Klub Deportiboaren egoitzan.

 

Txapeldunak: Fomento Cultural (Txus Agirretxe)

Eskerrik asko Eibarrera etorri zineten guztioi eta datorren urtean ere zuek hemen izatea espero dugu.

Informazio osatua eta argazki-galeria hemen.

Kronikak:

Larunbatean jokatuko da Eibarko Hiria 32. Xake Txapelketa

Larunbatean arratsaldeko 16:00tatik aurrera jokatuko da Untzaga plazan Jose Mari Kruzetaren omenezko Eibarko Hiria 32. Xake Txapelketa Eibarko Klub Deportiboak antolatuta.

Euskal Herri guztiko 16 talde ezberdinen partehartzearekin, arratsalde guztian zehar, 5 minutuko partidak jokatuko dituzte bertaratutako jokalariek. Partida modalitate hau xakeak duen bizi eta ikusgarriena da, minutu gutxiren buruan bukatu behar izaten baitute partida jokalariek.

Untzagan izango dira larunbatean azken edizioetako txapeldunak, Leioako Altzaga, Donostiako Gros Xake Taldea edo Errenteriako Fomento Cultural; eta baita Azkoitia, Hondarribia, Zornotza edo Portugalete taldeak ere, batzuk esatearren.

Partidak Untzaga plazan jokatuko dira, horrela Klub Deportiboak duen xakea kalera ateratzeko helburua betez. Eguraldiak lagunduko ez balu, partidak Udaletxearen arkupean jokatuko dira.

Aurten gainera, berritasun gisa, “Xake Mate Fibrosi Kistikoari” izeneko sentsibilizazio kanpaina antolatuko du ARNASA Gipuzkoako Fibrosi Kistikoaren elkartearekin. Elkarte honek gaixotasun hau duten pertsonak eta beren familiak laguntzeko helburua du, arraro gisa kontsideratuta dagoen gaixotasun degeneratibo honen ondorioak arintzen laguntzeko.

Bostgarren Arrasaten

Arrasate-San Andres xake elkarteak antolatuta, Arrasaten izan ginen hauteskunde-egunez Santamasetako 27. xake txapelketan. Bertan, 8 talderen harteko bi itzulitako liga jokatu genuen, giro ezinhobean eta 5. postua lortu genuen sailkapenean. Hemen sailkapen nagusia:

  1. Salcedo 53 puntu
  2. Abadiño 35,5 puntu
  3. Zornotza 33.5 puntu
  4. Easo 32.5 puntu
  5. C.D. Eibar 30,5 puntu
  6. Arrasate A 23 puntu
  7. Itsas Zaldunak 12 puntu
  8. Arrasate B 23 puntu

Eskerrik asko Arrasateko elkarteari gonbidapenagatik.

Abadiño Txapeldun Eibarko Hiria 31. Xake Txapelketan

IMG_20150620_215334711Larunbat arratsaldez xakea izan zen protagonista Untzagan beste urte batez bertan antolatu baikenuen Jose Mari Kruzetaren omenezko Eibarko Hiria 31. Txapelketa.

Bertan Euskal Herri osoko 22 taldek hartu zuten parte, Hondarribitik, Donostiatik, Gasteiztik, Portugalete edo Leioatik etorritako taldeekin eta inguruko Azkoitia, Zornotza, Elorrixo edo Ermukoekin xake giro bikaina sortu zen Untzagan.

Deportiboko talde bik ere hartu zuten parte. A taldean Asier Etxagibel (Arrasateko jokalaria), Ricardo Bastida, Julen Garro eta Edu Olabe aritu ziren. B taldean Jon Arana, Xabier Beorlegi, Jose Antonio Garrido eta Emilio José Freire. Gurekin aritzen den David Pérez, Ermuko taldean aritu zen Asier Ibaibarriaga eta Hondarribiko Goio Uriarte eta Ramon Nogesekin batera. Beste eibartar batzuk ere aritu ziren, Jose Ricardo Gómez Gasteizko Egidazurekin eta Javier Rodriguez Donostiako Easorekin. Xakea guztiontzako kirola da, eta nahiz eta jokalari gehienak gizonezkoak izan, han aritu ziren Eihartze Buiza eta Ainhoa Barrio Portugaleteko taldean, Cecilia Pérez Gros Gazteak taldean eta Maitane Varas Abadiñokoan.

Txapelketan talde guztiak guztien aurka aritu ziren, guztira 5 ordu inguruko txapelketa baten 5 minutuko partida azkarrak jokatuz. Azkenean 21 txanda luzeren ostean, Abadiñoko taldea gailendu zen sailkapenean 69,5 puntu lortuta; bigarren Irungo Batalla taldea sailkatu zen 69 punturekin eta hirugarren postua Leioako Altzaga taldearentzat izan zen. Deporreko A taldeak 5. postua lortu zuen eta B taldeak 16.a

Mahai bakoitzeko jokalari onenen zerrenda hauxe izan zen:

  • 1. mahaia: Rodrigo Sarralde FIDE Maisua (Abadiño)
  • 2. mahaia: Ricardo Bastida (C.D. Eibar)
  • 3. mahaia: Diego Sarralde (Abadiño)
  • 4. mahaia: Erlantz Miguelez (Altzaga)

Txapelketaren emaitza guztiak info64.org webgunean ikusi ditzakezue.

Hondarribi-Marlaxkako lagunek euren webgunean jarri dute txapelketaren kronika hemen duzue euskaraz eta hemen gaztelaniaz.

Sari banaketari dagokionez bertan izan ziren Patxi Lejardi (Eibarko Udaleko zinegotzia) eta Margari Olañeta (Jose Mari Kruzetaren alarguna). Txapelketaren ostean, bertaratutako guztiei ondo merezitako afaria eskaini genien Klub Deportiboan.

Eskerrik asko guztioi etortzeagatik eta datorren urtera arte!