Archivo de la categoría: Ekintzak

Gros Xake Taldea garaile Jose Mari Kruzetaren omenezko 32. Eibarko Hiria Txapelketan

03/07/2016Ekintzak, Kronikakxakea

Uztailaren 2an arratsaldez, noizean behineko euriaren bisitarekin jokatu zen Jose Mari Kruzetaren omenezko Eibarko Hiria 32. xake txapelketa Untzaga Plazan. 14 talde bertaratu ziren bertara oraingoan, iazko 22 taldetatik urrun, baina berriz ere xake-arratsalde bikain batez gozatzeko gogoarekin. Aurretik 13 txanda, lagunak berriz ikusteko aukera eta gure kirola praktikatzeko aukera: larunbat baterako plan hoberik bai? 😉

Arratsalde lasai baten ostean, Donostiako Gros Xake Taldea izan zen garaile, guztira 45.5 puntu lortuta. Santi Gonzalez, Iñigo Argandoña, Iñigo Martin, Ivan Muñoz eta Luis Olaizolak osatutako taldeak erritmoa markatu zuen eta inork ezin izan zion jarraitu ere egin. Berdinketa bakarra atera zioten, eta gainontzeko match guztiak irabazi egin zituzten. Bigarren postuan 37.5 punturekin Leioako Altzaga sailkatu zen, Alvaro Diaz, Asier Gonzalez, Rafa Baños eta Erlantz Miguelezek osatutako taldearekin. Hirugarren postua, 36 punturekin, Errenteriako Fomento Cultural taldearentzat izan zen, bertan Txus Agirretxe, Jose Ramon Ros eta Juan Jose Saenz aritu ziren. Hemen sailkapen osoa:

Rk	ID	Team	Fed	Games	+	=	–	Pts
1	7	GROS	ESP	13	12	1	0	45.5
2	2	ALTZAGA	ESP	13	10	1	2	37.5
3	6	FOMENTO	ESP	13	8	5	0	36
4	1	ABADIÑO	ESP	13	9	2	2	35
5	9	IZEAGA	ESP	13	5	4	4	26
6	4	EASO	ESP	13	5	3	5	25.5
7	13	SANTURTZI	ESP	13	4	4	5	24.5
8	11	ZARAUTZ	ESP	13	2	5	6	23.5
9	10	PORTUGALETE	ESP	13	3	3	7	22
10	5	EGIDAZU	ESP	13	2	4	7	21.5
11	8	HONDARRIBI-MARLAXKA	ESP	13	4	2	7	20.5
12	12	ZORNOTZA	ESP	13	2	5	6	20
13	14	C.D. EIBAR A	ESP	13	3	2	8	16.5
14	3	ANAITASUNA-KAKUTE	ESP	13	0	3	10	10

Aurtengoan, aurreko postuetatik urrun geratu zen Eibarko taldea, azken aurreko postuan hain zuzen ere 16.5 punturekin. Ez zuen egun ona izan ez David Pérez, Jon Arana, Emilio Freire eta Lander Ajak osatutako taldeak. Azkoitiko Anaitasuna Kakuterekin erdibana osatu zuten taldean ere izan zen eibartarrik, han aritu baitziren Jose Antonio Garrido eta Aitor Beorlegui.

Taldekako txapelketa izanik, mahai bakoitzeko jokalari onenarentzako sariak ere izan ziren Lehenengo mahaiko jokalari onena Donostiako Easo taldean aritu zen Xavier Bedauertentzat izan zen 12 puntu lortu baitzituen. Bigarren mahaian Zarauzko Erik Juez izan zen onena 10.5 punturekin, Iñigo Argandoñarekin berdinduta. Hirugarren mahaian Juan Jose Saenz Fomentoko jokalaria izan zen onena partida guztiak irabazita. Laugarren mahaian Fomentoko Aitor Gonzalez gailendu zen 12 punturekin, Groseko Ivan Muñozekin berdinduta.

Sari banaketan, Margari Olañeta izan genuen gure artean eta baita Patxi Lejardi zinegotzia ere Eibarko Udalaren izenean.

Arratsalde guztian, gainera, ARNASA elkartearekin elkarlanean Xake Mate Fibrosi Kistikoari kanpainan parte hartu genuen, horretarako gaztetxo eta ez hain gaztetxoentzat, xakean aritzeko aukera izan zen Errenteriako Fomento Culturalek utzitako xake erraldoiari esker eta xakean aritzeko jarri genituen mahai eta jokuei esker. Gaixotasun hau ezagutzera eman eta gizarteratzeko aukera ezinhobea izan zen.

Eskerrik asko atzo Eibarrera etorri zineten guztioi, guk adina disfrutatu bazenuten, ez da gutxi! Datorren urtean gehiago!

Argazki gehiago hemen.

Larunbatean jokatuko da Eibarko Hiria 32. Xake Txapelketa

29/06/2016Azkarrak, Ekintzak, Txapelketakxakea

Larunbatean arratsaldeko 16:00tatik aurrera jokatuko da Untzaga plazan Jose Mari Kruzetaren omenezko Eibarko Hiria 32. Xake Txapelketa Eibarko Klub Deportiboak antolatuta.

Euskal Herri guztiko 16 talde ezberdinen partehartzearekin, arratsalde guztian zehar, 5 minutuko partidak jokatuko dituzte bertaratutako jokalariek. Partida modalitate hau xakeak duen bizi eta ikusgarriena da, minutu gutxiren buruan bukatu behar izaten baitute partida jokalariek.

Untzagan izango dira larunbatean azken edizioetako txapeldunak, Leioako Altzaga, Donostiako Gros Xake Taldea edo Errenteriako Fomento Cultural; eta baita Azkoitia, Hondarribia, Zornotza edo Portugalete taldeak ere, batzuk esatearren.

Partidak Untzaga plazan jokatuko dira, horrela Klub Deportiboak duen xakea kalera ateratzeko helburua betez. Eguraldiak lagunduko ez balu, partidak Udaletxearen arkupean jokatuko dira.

Aurten gainera, berritasun gisa, “Xake Mate Fibrosi Kistikoari” izeneko sentsibilizazio kanpaina antolatuko du ARNASA Gipuzkoako Fibrosi Kistikoaren elkartearekin. Elkarte honek gaixotasun hau duten pertsonak eta beren familiak laguntzeko helburua du, arraro gisa kontsideratuta dagoen gaixotasun degeneratibo honen ondorioak arintzen laguntzeko.

Abadiño Txapeldun Eibarko Hiria 31. Xake Txapelketan

21/06/2015Azkarrak, Ekintzak, Kronikak, Txapelketakxakea

Larunbat arratsaldez xakea izan zen protagonista Untzagan beste urte batez bertan antolatu baikenuen Jose Mari Kruzetaren omenezko Eibarko Hiria 31. Txapelketa.

Bertan Euskal Herri osoko 22 taldek hartu zuten parte, Hondarribitik, Donostiatik, Gasteiztik, Portugalete edo Leioatik etorritako taldeekin eta inguruko Azkoitia, Zornotza, Elorrixo edo Ermukoekin xake giro bikaina sortu zen Untzagan.

Deportiboko talde bik ere hartu zuten parte. A taldean Asier Etxagibel (Arrasateko jokalaria), Ricardo Bastida, Julen Garro eta Edu Olabe aritu ziren. B taldean Jon Arana, Xabier Beorlegi, Jose Antonio Garrido eta Emilio José Freire. Gurekin aritzen den David Pérez, Ermuko taldean aritu zen Asier Ibaibarriaga eta Hondarribiko Goio Uriarte eta Ramon Nogesekin batera. Beste eibartar batzuk ere aritu ziren, Jose Ricardo Gómez Gasteizko Egidazurekin eta Javier Rodriguez Donostiako Easorekin. Xakea guztiontzako kirola da, eta nahiz eta jokalari gehienak gizonezkoak izan, han aritu ziren Eihartze Buiza eta Ainhoa Barrio Portugaleteko taldean, Cecilia Pérez Gros Gazteak taldean eta Maitane Varas Abadiñokoan.

Txapelketan talde guztiak guztien aurka aritu ziren, guztira 5 ordu inguruko txapelketa baten 5 minutuko partida azkarrak jokatuz. Azkenean 21 txanda luzeren ostean, Abadiñoko taldea gailendu zen sailkapenean 69,5 puntu lortuta; bigarren Irungo Batalla taldea sailkatu zen 69 punturekin eta hirugarren postua Leioako Altzaga taldearentzat izan zen. Deporreko A taldeak 5. postua lortu zuen eta B taldeak 16.a

Mahai bakoitzeko jokalari onenen zerrenda hauxe izan zen:

1. mahaia: Rodrigo Sarralde FIDE Maisua (Abadiño)
2. mahaia: Ricardo Bastida (C.D. Eibar)
3. mahaia: Diego Sarralde (Abadiño)
4. mahaia: Erlantz Miguelez (Altzaga)

Txapelketaren emaitza guztiak info64.org webgunean ikusi ditzakezue.

Hondarribi-Marlaxkako lagunek euren webgunean jarri dute txapelketaren kronika hemen duzue euskaraz eta hemen gaztelaniaz.

Sari banaketari dagokionez bertan izan ziren Patxi Lejardi (Eibarko Udaleko zinegotzia) eta Margari Olañeta (Jose Mari Kruzetaren alarguna). Txapelketaren ostean, bertaratutako guztiei ondo merezitako afaria eskaini genien Klub Deportiboan.

Eskerrik asko guztioi etortzeagatik eta datorren urtera arte!

Larunbatean jokatuko da Eibarko Hiria 31. Xake Txapelketa

16/06/2015Ekintzak, Rápidas, Torneosxakea

Larunbatean arratsaldeko 16:00tatik aurrera jokatuko da Untzaga plazan Jose Mari Kruzetaren omenezko Eibarko Hiria 31. Xake Txapelketa Eibarko Klub Deportiboak antolatuta.Euskal Herri guztiko 20 talde ezberdinen partehartzearekin, arratsalde guztian zehar, 5 minutuko partidak jokatuko dituzte bertaratutako jokalariek. Partida modalitate hau xakeak duen bizi eta ikusgarriena da, minutu gutxiren buruan bukatu behar izaten baitute partida jokalariek.

Untzagan izango dira larunbatean azken edizioetako txapeldunak, Leioako Altzaga, Donostiako Gros Xake Taldea edo Errenteriako Fomento Cultural; eta baita Elgoibar, Elorrio, Arrasate edo Zornotzako taldeak ere, batzuk esatearren.