Archivo de la categoría: Campeonatos

Xabier Beorlegi izan da Deporreko xakelari onena Gipuzkoako Txapelketa Nagusian

Urritik abendura jokatu diren Gipuzkoako Bakarkako Txapelketak larunbatean bukatu ziren azkenengo jardunaldia jokatuta.

Gipuzkoako Txapelketa Nagusian Xabier Beorlegik berdinketa lortu zuen Carlos Berdoteren aurka eta Jon Aranak Patxi Moreno gaztea garaitu zuen. Horrenbestez Deporreko bi xakelariek 3,5 puntu lortu dituzte sailkapenean eta Xabier 16. postuan sailkatu da eta Jon 21. postuan. Txapelketaren garailea Alejandro Franco Nazioarteko Maisua izan da eta berarekin izan dira podiumean Iñigo Argandoña eta Asier Lakuntza.

Bigarren mailako txapelketan, berriz, azkenengo txandan eibartarren arteko derbia jokatu zen, Jose Antonio Garrido eta Adrian Martinikorenaren artekoa hain zuzen ere. Partida luze baten ostean, Jose Antonio Garrido gailendu zen bertan, eta horri esker sailkapeneko 6. postua lortu zuen 4,5 punturekin. Adrian 13. postuan sailkatu zen 3,5 punturekin. Txapelketaren podiuma Jon Jauregi, Xabier Garmendia eta Asier Cuestak osatu zuten.

Hirugarren mailako txapelketan Aitor Beorlegi zein Oier Garciak irabazi egin zituzten azken txandako partidak, Silvestre Moreiro eta David Lopez-Carrascoren aurka hurrenez hurren, horrela Aitor 17. postuan sailkatu zen 4,5 punturekin eta Oier 36. 3,5 punturekin. Txapelketaren garailea Jose Andres Perez izan zen, Xabier Aranzabal eta Alberto Belosillo 2. eta 3. postuan gelditu zirelarik.

Dena erabakitzeke Danobat Elgoibar Txapelketan

Bestalde, ostegunean jokatu zen Elgoibarko Danobat Txapelketaren azken aurreko txanda. Bertan Jon Arana liderrak berdindu egin zuen bere partida Egoitz Irureren aurka eta, lidergoan jarraitzen duen arren, orain Isidro Ruizekin berdinduta dago sailkapenean 5 punturekin. Deporreko beste bi jokalariek, Jon Esturo eta Jose Antonio Garridok galdu egin zituzten euren partidak. Txapelketaren azken txanda abenduaren 13an jokatuko da eta bertan Jon Aranak Johnny Sadusea venezolarra izango du aurrean.

Gipuzkoako Banakako Txapelketen 3. txanda jokatu da asteburuan

Gipuzkoako Banakako Xake Txapelketak martxan daude beste urtebetez. Gure klubeko hainbat jokalari ari dira bertan eta azken urteotan izan dugun parte hartze maila handiena daukagu klubean. Klubeko jokalariak Donostian ari dira, baina Billabonan ere jokatzen ari da 3. mailako txapelketa bat.

Maila nagusian Jon Arana eta Xabier Beorlegi ari dira. Hiru txandaren ostean Xabierrek 1,5 puntu lortu ditu eta Jonek 1. Datorren asteburuan Xabierrek Ivan Iturralde gaztea izango du aurrean eta Jonek Christian Sanchez.

Bigarren mailan ari dira Jose Antonio Garrido eta Adrian Martinikorena. Joseanek 2 puntu daramatza eta Adrianek erdia. Datorren astean Joseanek Ander Uranga izango du aurrean eta Adrianek Juan Cruz Iturralde.

Hirugarren mailan ari dira Oier Garcia, Aitor Beorlegi eta Igor Zenigaonaindia. Igorrek 2 puntu daramatza, Oierrek 1,5 eta Aitorrek 1. Datorren astean Igorrek Andres Peinado izango du aurrean, Oierrek Alex Odriozola eta Aitorrek Zigor Urcelay.

Aitor Beorlegui 6. Euskadiko Eskolarteko Txapelketan

Arrasateko Uarkape frontoian jokatu ziren maiatzaren 26 eta 27an Euskadiko 37. Eskolarteko Kirol Jokoak Euskal Xake Federakuntzak eta Eusko Jaurlaritzak antolatuta.

Gipuzkoako Eskolarteko Txapelketan lortutako txartelari esker, Aitor Beorlegui infantil mailan aritu zen eta 6. postua lortu zuen 4 punturekin. Txapelketaren garailea Manex Regillaga elorriotarra izan zen. Hemen sailkapen osoa. Zorionak!

 

Gipuzkoako Eskolarteko Xake Txapelketen Finalak

Apirilaren 21ean Donostiako Gros Xake Taldearen egoitzan jokatu ziren Gipuzkoako Xake Federakuntzak eta Gipuzkoako Foru Aldundiak antolatutako Gipuzkoako Eskolarteko Xake Txapelketen finalak infantil eta alebin kategorietan.

Bi kategorietan izan ziren Eibarko jokalariak. Hemen, lortu zituzten emaitzak

Infantilak

Infantil mailan Adrian Martinikorena (Itzio BHI) eta Aitor Beorlegui (La Salle Azitain) aritu ziren. Jokatutako 6 partiden ostean, Adrian eta Aitorrek 4na puntu lortu zituzten eta berdinduta gelditu ziren sailkapenaren 4. postuan. Desberdinketa sistemak direla-eta, Aitor Beorlegui 4. sailkatu zen eta Adrian Martinikorena 5. Hori dela eta, Aitorrek maiatzaren 26 eta 27an Arrasaten jokatuko diren Euskadiko Eskolarteko Jokoetan jokatzeko sailkapena lortu zuen.

Alebinak

Alebin mailan izan genuen parte hartze handiena. Bertan aritu ziren Malen eta Intza Fernandez, Malen Etxeberria eta Mikel Larrazabal. 6 partidaren ostean Intzak 2,5 puntu, Mikelek 2 puntu eta Malen Etxeberria eta Malen Fernandezek puntu bana lortu zuten.

Hemen txapelketan ateratako argazki batzuk