Klubaren mendeurreneko ekintzen barruan, Gipuzkoako Xake Federakuntzarekin elkarlanean eta Eibarko Udalaren laguntzarekin, Gipuzkoako bakarkako xake txapelketak Eibarren antolatuko ditugu irailaren 28tik aurrera.
Txapelketei hasiera emateko, bakarkako partida azkarren txapelketa izango dugu irailaren 28an, 16:00tan hasita Errebaleko A eta B geletan. Txapelketa honetan 3 minutu eta egindako jokaldi bakoitzeko 2 segundo gehigarri izango dituzte jokalariek partidak jokatzeko.
Hurrengo asteburuan, urriaren 5ean, taldekako partida azkarren txanda izango da. San Juanetan Untzaga plazan jokatzen dugun erako txapelketa izango da berau 4 jokalaritako taldeek osatuta. Hau ere, Errebaleko A eta B geletan izango da.
Aurten gainera, berritasun gisa, bakarkako zein taldekako txapelketan FIDE nazioarteko xake federakuntzaren elo sailkapenerako balioko dute.
Urriaren 12an, Gipuzkoako Txapelketa Nagusia jokatuko da. Lehenengo txanda Errebalen izango da, eta ondorengo txandak (larunbat bakoitzean partida bat, azaroaren 23ra arte), klubean bertan jokatuko dira. Txapelketa nagusiarekin batera, eta jokalari nahikoak izen emango balu, 2. eta 3. mailetako txapelketak ere jokatuko dira.
Deja una respuesta