Eibartik irteera: 8:00etan
Parte-hartzaileak: Fernando, Antón, Julián, Moya, Iñaxio, Garate, Ávila, Joserra, Arrate, Ángel, Andoni, Josetxo, Julen eta Pintado.
Autoak: Iñaxio, Josetxo, Julián eta Javi Ávila.
Diman hasi dugu gaur proposatutako ibilbidea. Olazabal auzotik pasatuko gara handik Illunbe mendira igotzeko, Lamindao auzoa zeharkatu , eta, amaian, Urragiko atxako tontorrera igotzeko.
Dimako udaletxe ondotik ekin diogu txangoari (8:55), erreka zeharkatu eta gorrantz egin dugu ehun bat metro pista batetik, hau bukatzean, marra zuri-berdeekin markatutako bidea hartu dugu (9:03), aldapa piko bat gainditutakoan Olazabal auzoan gaude (9:15).
Norabidea mantendu dugu eta, metro batzuk aurrerago eskumara biratu (9:17), berehala, bidegurutzean, ezkerrera jo dugu (9:20) arboladi baten sartzeko. Lamindao auzora doan pista zabal batetik goaz, baina gure helburua Illunbe mendira igotzea denez, argi joan behar dugu, bidarri bat ikusitakoan eskumara jokotzeko (9:40), laranja kolorezko marrak, gorantz egin eta laster gaude tontorrean, Illunbe (445 m.) (9:55)
Igo garen tokitik itzuli pistara, eta eskumatik jarraitu dugu , aurrerago, (10:15) Dima eta Arratiako bailera lotzen duen errepidea zeharkatu eta Lamindao auzoko eliz aldera jo dugu.
Hego-ekialderantz joan behar dugu, Petralanda baserri ondotik pasa eta bere izeneko lepotik. Bidegurutze baten mugarri handi bat ikustean, ezkerretik jarraitu dugu, aurrerago Goikoganeko lepora iritsi (10:45) eta ezkerrera hartu dugu porlanezko pistatik. Aurrean daukagun antenara ailegatu baino 100 bat metro aurrerago, bidarrekin markatutako bidezidortxo batek tontorrera igo gaitu Urragiko atxa (588 m.) (11:05). Argazkiak egin eta euria ari duenez , ez du luzaroan egingo, agudo ekin diogu jaitsierari.
Itzultzeko bidea, gorantz ekarri dugun berdina da Lamindao auzora iritsi arte (12:00), hemen eskumara jo dugu Dimara doan errepidetik. Arostegieta auzoa pasatutakoan, errepidea utzi dugu gure ezkerrean lasterbide bat hartzeko (12:20) Dimara doan errepidera jaitsi arte, hemen beherantz jarraitu dugu errepidetik, 350 bat metro ibilitakoan eskumara egiten duen kurba zabal batean, ezkerrean gorantz doan pista bat hartu dugu (12:30) (errepidetik ez ibiltzearren), Olazabal auzotik pasa eta handik behera Dimara (12:55).
Erropak aldatu eta Baltzola jatetxera joan gara bazkaltzera. Menua nahiko zabala da 10 €tan, Errioxako ardo beltzekin eta nafar gorriekin 13 €tan jarri zaigu. Kafeak eta patxaranak Josetxok ordaindu ditu bere urtebetetzea ospatzeko.
Beste egun eder bat pasa dugu, Krabelineko lagun gehienok parte hartu dugularik.
