Etiketa honen artxiboa: 2013

“Besta Berri” Zornotza eta Andoainen

Besta Berri Zornotza eta Andoainen

Ia urte bete pasa da joan den urteko abenduan, Bilboko Arriagan, Juan Antonio Urbeltzen zuzendaritzapean eta Argia, Duguna, Haritz, Maritzuli, Xinkako eta Kezkako dantzarion parte hartzearekin. Denboralditxoa generaman berriz ikuskizuna taularatu gabe, maiatzaren 18an Euskal Jaien bueltan Eibarren bertan eman genuenetik hain zuzen ere. Eta orain berriz, denbora gutxian, apenas jantziak gainetik kendu eta garbitzeko astirik izan dugu: Zornotzan lehenengo urriaren 26an eta, hamabost egun geroago, Andoainen, azaroaren 9an.

2013-11-08_Besta-Berri_Andoain_IMG_1338_IZ

Udako oporretatik bueltan, Arrate eta Iruñeko ezpata-dantzen saioak atzean laga ostean ekin genien etxeko prestaketa laneri. Besta Berrin tokatzen zaizkigun konpromisoak behar den bezela bete ahal izateko gure gazteenak hutsuneak betetzera sartuak ziren ikuskizunean eta haiek ere fin hartu zituzten egin behar berriak. Zornotzarako eguna gerturatu ahala, aurreko asteburuetan partaide guztiak elkartuta hautsak kendu genizkien jantzi eta dantzeri Donostian izandako saioetan.

2013-11-08_Besta-Berri_Andoain_IMG_1413_IZ

Eguna iritsita ohi bezela azken orduko errepasoa egin genuen lekua hartu eta dudak uxatzeko. Frontoian zen Zornotzakoa, balioaniztun eraikina, baina honek sarritan berarekin dakarren hoztasunetik at, txukun antolatuak ziren eszena atzekalde eta aldatzeko lekuak. Dantzariok eskertu genuen lekua izatea, bertatik bertara, erropa aldaketak azkar egin eta dena ere behar den bezela antolatua izateko.

2013-11-08_Besta-Berri_Andoain_IMG_1677_IZ

Lehen aldia zutenen urduritasunek markatu zuten ikuskizuna, berritasunak. Beldurrak beldur ederto joan zen emanaldia; barrutik hala igarri genuen eta kanpotik begira izan genituenek ere hala adierazi ziguten. Dutxak, materiala jaso eta pozik egindako lanaz etxera, hurrengora arte.

2013-11-08_Besta-Berri_Andoain_IMG_1738_IZ

Hamabost egun beranduago Andoainen genuen topagunea berriz ere. Zornotzako entsegua eta gero, betiko ikutuez gain, geneukanarekin atera ginen agertokira. Egindakoetatik saiorik txukunena eman ez genuela jakinda ere, jendearen txalo zaparrada beroa jaso genuen eta horretxekin aurtengoz agur esan genion Besta Berriri. Hurrengoko zita urtarrilaren 4an, Gasteizen, gabon zaharretako nagiak eta gehiegikeriak gainetik kendu eta 2014. urte berriari ongi etorria egiteko. Zer hoberik dantzan hastea baino!

2013-11-08_Besta-Berri_Andoain_IMG_1890_IZ

Dantza Coliseoan: Ertza: Act of God

Ertza: Act of God

2013ko azaroak 15, ostirala, 20:30etan

Juan Sebastian Bach-en musika darabil Asier Zabaletak lan honetan sinesmen erlijiosoei buruzko gogoeta egiteko. Dantzaren plazer fisiko eta estetikoaz haratago, dantza gogoetarako tresna moduan darabil Ertza konpainiak.

Harkaitz Canok hitzen bidez adierazitako kezkei ematen die segida Asier Zabaletak dantzaren bidez: “Jainkoa gure arduretatik ihes egiteko asmakizun bat al da? Edo askatasunari diogun izua arintzeko adoptatzen dugun modua da?”

ACT OF GOD, Ertza

Argazkia: Gorka Bravo CC-BY-SA

Lau dantzarik gorpuzten eta dantzatzen dute Act of God: Eneko Gil, Lorentxa Iturralde, Noemi Viana eta Asier Zabaleta berak. Ander Lipus-en laguntza izan dute dramaturgian, eta Harkaitz Canok idatzi ditu testuak.

Ertza: Act of God
2013ko azaroak 15, ostirala, 20:30ean
Eibar, Coliseo antzokia
Sarrera: 8 € (internet bidez erosteko hemen)

Arrateko dantzak Iruñean leku eginez

Iruñeko Duguna taldeko lagunek, Aldapako San Ferminen ezpata-dantza plazaratu zutela bosgarren urtea betetzen zela eta, gurekin batera ospatu nahi izan zuten seinalatutako asteburuan bertara dantzara gonbidatuaz. Bigarrenez irailean Arrate egunez egin beharreko lanak eskaintzeko aukera izan genuen Nafarroako hiriburuan.

Larunbat bazkalostean, Iruñera iristeaz batera, euriak jaso gintuen, gogotsu. Eguraldiak onera egingo zuelako esperantzarekin eta ordutegiarekin genuen marjina tarteko aurreikusitakoarekin aurrera jarraitzea erabaki genuen. Dugunakoek Arrotxapean erabiltzen duten eskolapioen eskolan batu eta beharrezko agindu eta argibideak eman eta gero segituan ginen erropa zuriak janzten; ostegunean Donostian Gipuzkoako urrezko dominaren ekitaldian erabili ostean, ez zuten lan makala hartu Arantzak eta Maikak erropak plantxatzen berriz luzitzeko eran izan gintezen!

Atertu ostean, eta kaleak lehortzen joan zitezen astia ematen zezan, ekitaldia ordu bete atzeratzea erabaki zen. Prest ginen seiak ingururako baina kaleak oraindik ere busti-busti eginda zeudenez, abarketak eskuan hartuta urreratu ginen Maiatzaren 2an Dugunak duen egoitzara. Kaleko oinetakoak lanerako abarketengatik aldatu eta, Oier Araolaza buru zela, zazpiak puntuan ekin genion kalejirari. Enrike Montero eta Ainara Ibañez txistuekin eta Iñaki Barua atabalarekin talde buru genituela lan berezia izan genuen Iruñeko alde zaharreko kaleeten tragoa eskuan zuela zebilen jende andanaren artean bidea zabaldu eta udaletxe plazara iristen. Ikusleak ala ikusgarriak, nork ote zuen harridura aurpegi haundiagoa ez dakigu!

2013-09-28_Irunea-ezpata-dantza_0311_IZ

Plazan ginela, ezpata-dantzarekin hasi orduko, erropen zuritasunak eta iriarena doinuak erakarrita segituan inguratu gintuzten iruindarrek. Arrateko ezpata-dantza lehenengo eta trokeo dantzak atzetik, betiko ahaleginak egin genituen saioa txukun joan zedin. Jendearen txaloek gure eginahalak gozotu ostean, erretiratu eta berriz oinetakoak aldatu aurretik, familia argazkia egin genuen udaletxe parean.

2013-09-28_Irunea-ezpata-dantza_0407_IZ2013-09-28_Irunea-ezpata-dantza_0530_IZ

Dutxa eta gazteenen atontze lan sakonen ostean, afaria zain genuen Dugunakoen egoitzan. Beraiek egin zituzten zerbitzari lanak eta giro ezin hobean joan zitzaigun afalordua. Gero gerokoak izan ziren alde zaharreko kaleetan eta berandu gabe Arrotxapeako eskolapioetan zain genuen hotel inprobisatura erretiratu ginen lotara.

Igande goizez, asteburuko eguraldi totelak nahikoa eutsi zion eta Aldapako San Ferminen ezpata-dantza ederraz gozatzeko parada izan genuen; jendez gainezka zeuden kaleetan barrena lehehengo eta udaletxe plazan ekitaldi buruan. Dantzak bukatuta, bazkari kontuak Iruñean bertan egin genituen, autobusa hartu eta berriz etxera bueltatu aurretik.

Bukatu aurretik, eskerrik asko eta zorionik beroenak Dugunako lagun taldeari zuen artean halako modu adeitsuan leku egitearren. Nahi duzuen arte!

[Hemen Iñaki Zugastik ateratako argazki gehiago]

Ostarteak zabalak dira gero Arrate gainean

10:55 Argazkia egiteko ordua dugu. Dantzari gehienak prest daude. Iñaki eta Felipe, argazkilariak udalekuko terrazako atean daude. Kezkatuta begiratzen dute kalera. Euri fin eta itsaskorrak dirau, azken orduetan bezala. Kalabobos famatua. Eta ez du trazarik atertzeko. Erabakiak hartzeko unea da. Arriskatu egingo gara, ez zaigu beste irtenbiderik okurritzen. Aulkiak prestatu eta dantzariak antolatzen hasi gara. Nahikoa burukomin izan dugu dantzari guztiak argazki kameren objetibo txikietan kabitu ahal izaten. 64 dantzari argazkirako antolatu nahian, ez gara euriaz gehiago akordatu. Ez eta beharrik ere. Ostartea zabaldu baita dantzariak argitara atera ahala. Lotsati lehenengo, lotsagabe ondoren, eguzkitsu azkenerako. Ostarteak zabalak dira gero Arrate gainean!

2013-09-08_Arrate-eguna-IMG_9095_IZ

Argazkia bukatu eta urteroko sesioa. Eliza barrura ezpata-dantzaren barruko ala kanpoko lerroak tokatzen ote diren. Aurten barrukoak sartu dira. Datorren urtean akordatzen ez bagara, aber hemen begiratzeaz gogoratzen garen. Hamaiketako meza nagusian, konsagrazioaren ondoren sartu ohi gara eliza barrura. Altxatu du gora Xabier parrokoak ostia eta prestatu ditugu barruko bi lerroak. Ezpatak altxatu eta zubiak egiteko uneak “emozio” fuerteak izaten ditu berarekin. Jendea gain-gainean, eta ezpatak trabesean, indarka, batera eta bestera… halako batean “Kristoren odola” eta “eliztarren batena” elkartuko zaizkigu…

2013-09-08_Arrate-eguna-IMG_9109_IZ

Prozesio motza

Gurutzerako bidea lokaztuta zegoela eta, prozesioa elizaren inguruan egingo dela abisatu digute. Pena hartu dugu, polita izaten baita basoko ezpata-dantza. Asfalto garbian azkar egin dugu buelta, eta elizako atarian Ama Birjinaren aurrean dantzatu dugu Arrateko ezpata-dantza.

2013-09-08_Arrate-eguna-IMG_9174_AU2013-09-08_Arrate-Eguna_FL_9841

Aurtengo lau bakarlariek bezperan ere dantzatu arren ez dute neke trazarik. Beasaingoak ditugu laurak: Nerea Mendizabala, Jaione Barandiaran eta Izaskun Salazar dira aurtengo hiru gonbidatuak, eta haiekin da, laukotea osatzen eta aitaponteko lanak eginez, Mikel Sarriegi.

2013-09-08_Arrate-eguna-IMG_9239_AU

Arrateko zelaiko floridadia?

Zelaiko lokatzean nekez aurki daiteke belar arrastorik. Azken bi egunetako euriek eta bezperako festak berde aztarnarik gabe utzi du zelaia (?), eta gosetutako basurde saldoak baino basa handiagoa utzi du. Olazabalen caddiea bezala ibili gara, greeen-eko egoera aztertzen, eta azkenean ezpata-dantza eta trokeo-dantzak probalekuan, harri gainean egitea erabaki dugu.

2013-09-08_Arrate-Eguna_FL_9940

Usartzako txistulariak ederki asko entzun ditugu aurten, soinu ekipo txukuna eta txosna guneko altabozekin lotura jarri baititu Udalak. Lejardik ur botilak ekarri dizkigu, eta aitzakiarik ez dago beraz dantzari ekiteko. Bi parrilla osatu ditugu ezpata-dantzan eta onenak eman ditugu trokeo-dantzetan. Beasaingo dantzariek Goierriko urratsekin loratutako zortziko ederrak dantzatu dituzte, eta ezpata-dantza berriz osatuta egin dugu erretreta, zerua eguzkitsu eta dantzariok irripartsu.

2013-09-08_Arrate-eguna-IMG_9276_IZ2013-09-08_Arrate-Eguna_FL_100182013-09-08_Arrate-Eguna_FL_101182013-09-08_Arrate-Eguna_FL_101482013-09-08_Arrate-Eguna_FL_101752013-09-08_Arrate-Eguna_FL_10286

Honen bestez, eskerrik asko kofrade lagun zaituztegun guztiori. Datorren urtean berriz hitzordua Arrate gainean, astelehenez, aste barruko zereginek uzten diguten einean. Gu hasiak gara abarketa berriak erosteko aurrezten!

2013-09-08_Arrate-eguna-IMG_9598_AU

Hemen Iñaki Zugastik eta Felipe Loyolak egindako argazki sorta:

Villacher Kirchtag 70. jaialdira

Austriako Villach herrian ospatzen den Kirchtag jaialdian parte hartuko du Kezka dantza taldeak abuztuaren 1etik 4ra. Kirchtag Jaialdiaren 70. urteurrena ospatzen da, eta hori dela programa erraldoia antolatu dute Austriako herri honetan.

Musika eta dantzaz gainezka izango da Villach jaialdi egunetan, izan ere, 50 musika emanaldi programatu dituzte eta dantzari dagokionez, Grezia, Georgia eta Austriako taldeek parte hartuko dute, Euskal Herria ordezkatuz parte hartuko duen Kezka dantza taldearekin batera. Festak irauten dituen astebetean 400.000 bisitari espero dituzte Villach-en.

2002-07-29-05_Villacher-Kirchtag-Haritz-EDT_1747

Abuztuaren 2an eta 3an eskainiko ditu Kezka dantza taldeak emanaldiak Villach-en. Jaialdiaren une gorena abuztuaren 3an izango da, kalejira erraldoi batek hartuko baititue Villach-eko kaleak. 100 talde (musika-bandak, musika tradizionaleko taldeak, dantza taldeak, e.a.) baino gehiago izango dira kalejiran, 4.000 lagun inguru musika egiten edo dantzan, eta 50.000 ikusle kale bazterretan ekitaldiaz gozatzen. Hemen 70. Villacher Kirchtag festaren programa:

Kezka dantza taldeko espedizioa 40 lagunek osatzen dute, musikak eta dantzariak denak, eta euskal dantza sorta berezi bat prestatu dugu Kirchtag jaialdian egingo ditun emanaldietan aurkezteko. Arrateko ezpata-dantza lagin bat ere Villach-en izango da.

2002 urtean, Elgoibarko Haritz dantzari taldeak parte hartu zuen Villach-eko Kirchtag jaialdian, eta horri esker Eibarko zenbait dantzarik jaialdia ezagutzeko aukera izan zuten.

2002-07-29-05_Villacher-Kirchtag-Haritz-EDT_1743

Villach, 2002. Oihane Valenciano trikitilaria Austriako soinu jole batekin.

Uztailaren 29an abiatuko da Kezka dantza taldea Austriara bidean, eta Italian eta Eslobenian geldialdiak egin ondoren abuztuaren 1ean iritsiko da Villach-era. Emanaldiak abuztuaren 2an eta 3an egin ondoren, Eibarrera itzulera abuztuaren 6rako aurreikusita daukagu.

 

Eibarko Dantzari Eguna 2013

Dantza eskolako ikasturte bukaera eta San Joan aurreko asteburua elkartzen dira Eibarko Dantzari Egunean. Ekainaren 14an, ostrial arratsaldean, Klub Deportiboko dantzariek hartu zuten Untzaga plaza, urtean zehar prestatutako zenbait dantza aurkezteko.

Gipuzkoako zinta-dantza, makil txikiekikoa eta agurra eskaini zituen lehen taldeak.

2013-06-14_Eibarko-Dantzari-Eguna_IZ_9487

Ondoren etorri ziren txikienen naturaltasuna, eta Inude eta Artzaien bizi-poza.

2013-06-14_Eibarko-Dantzari-Eguna_IZ_9550

2013-06-14_Eibarko-Dantzari-Eguna_IZ_9577

Lesakako ezpata-dantza, Andoaingo axeri-dantza eta Ekora, Eltziego eta Villabuenako dantzak etorri ziren ondoren.

2013-06-14_Eibarko-Dantzari-Eguna_IZ_96322013-06-14_Eibarko-Dantzari-Eguna_IZ_97402013-06-14_Eibarko-Dantzari-Eguna_IZ_97992013-06-14_Eibarko-Dantzari-Eguna_IZ_9814

Musikariak: Adolfo Jainaga eta Unai Narbaiza trikitilariak. Andoni Albitzar, Amaia Baglieto, Jose Migel Laskurain eta Iñaki Barua txistulariak.

2013-06-14_Eibarko-Dantzari-Eguna_IZ_9874

Arrain-saltzaile kaskaroten dantza, Neskatxen esku-dantza eta Arrateko trokeo-dantzak

2013-06-14_Eibarko-Dantzari-Eguna_IZ_98842013-06-14_Eibarko-Dantzari-Eguna_IZ_9890

Bukatzeko, Durangaldeko dantzari-dantza, erregelak, eta jotak

K130614_Dantzari_Eguna_IZ_b-IMG_0007K130614_Dantzari_Eguna_IZ_b-IMG_0095K130614_Dantzari_Eguna_IZ_b-IMG_0139

Iñaki Zugastik egindako argazkiak ondoko loturan:

Soka-dantza Santa Kurutzen 2013

Baserritar gazte belaunaldi berri bat loratu da Santa Kurutz ermitaren inguruetan. Batez ere Mandiola eta Gorostako baserrietan hazitako gazteak dira, Santa Kurutzeko festak antolatzekon testigua hartu, eta beraien bizi-pozakin kutsatu dituztenak. Emilio Azurmendi Sagarbitzaren hutsuneak markatu ditu aurtengo festak, baina belaunaldi berriaren festa-gogoak poza ekarri du Santa Kurutzera.

2013-05-05_Santa-Kurutz-soka-dantza_IZ_6586

Irati Kortabitarte eta Ane Sarasketa aurresku eta atzesku lanetan, eta Esther Kareaga eta Ainhoa Larrañaga zerbitzari lanetan, inguruko baserritarrek, emakumeek osatu dute soka ermita aurrean. Usartzarko txistularien doinura etorri dira desafioa, lehen gizonaren plazaratzea, kontrapasa, agurra, aita-san migel. Lehen zubiaren ondoren, Alberto Sarasketa “Azpiri” atera dute zelaira eta alabak dantzatu dio agurra.

2013-05-05_Santa-Kurutz-soka-dantza_IZ_6652

Bigarren zubia eta bigarren desafioaren ondoren iritsi dira fandangoa, arin-arin eta kalejira. Dantzarako baino iheserako hanka arinagoak dituela erakutsi du mutilen batek, baina gainontzekoek onenak emanda erantzun diote emakumeen gonbiteari eta dantza soltean haiekin aritzeko erronkari.

2013-05-05_Santa-Kurutz-soka-dantza_IZ_6693

Dantza osteko txorizo, odoloste eta gaztaiek ondo baino hobeto berdindu dituzte dantzak egindako hutsuneak.

Dantza Coliseoan: Argia: Besta Berri

Juan Antonio Urbeltzen zuzendaritzapean, eta Argia, Duguna, Maritzuli, Haritz, Gure-Kai, Xinkako, Ezpelur eta Kezka dantza taldeetako dantzari eta musikariekin, iritsiko da Eibarrera Besta Berri ikuskizuna. Corpus Christiren inguruko festetan inspiratuta, hiru piezak osatutako emanaldia prestatu du Argiak.

Eibarko Euskal Jaiaren egitarauan eta Eibarko Udalak antolatuta eskainiko da Coliseo antzokian Bilboko Arriaga antzokian estreinatu ondoren. Ekainaren 9an Donostian, Victoria Eugenia antzokian izango da Besta Berri.

2012-12-02_Besta-Berri-Arriaga_IZ_lehen-sorta_2474

Kezka dantza taldeko Irati Kortabitarte, Olaia Gabirondo, Luken Aranburu, Unai Txurruka, Egoitz Blanco, Ander Garitagoitia, Oier Araolaza, Maider Otaola, Enrike Izagirre, Ainhoa Larrañaga, Josu Garate eta Aiert Ibarbia dantzariak parte hartzen dute Besta Berri ikuskizunean.

Corpus Christi

Corpus Christi festa Urbano IVak ezarri zuen 1264an, eta indar harrigarriz zabaldu eta errotu zen Europako mendebaldeko festa egutegian. Gorpuzti eguneko prozesio eta erritualak iruditeria eta dantza agerraldi ederrenen erakusleku izan dira hainbat mendez. Corpus festarengandik egun gutxira, ekainaren 24an San Joan Bataiatzailearen inguruan ospatzen diren solstizioaren inguruko jaiekin lotura egiten du Besta Berrik. Bi horiek, Corpus eta San Joan, ardatz hartuta prestatu du Juan Antonio Urbeltzek Besta Berri ikuskizun berria.

2012-12-02_Besta-Berri-Arriaga_IZ_lehen-sorta_2405

Ikuskizunaren abiapuntua XVII. mendeko ezpata-dantzaren oroitzapenean aurkitzen da. 1659ko maiatzean, Maria Teresa Austriakoa eta Luis XIVaren arteko ezkontza zela eta Donostian egindako festa eta ezpata-dantzen testigantzak oinarri hartuta abiatzen da Besta Berri.

Muriska

Ondoren, Lapurdi eta Nafarroa Behereko prozesio segizioak, Oteizaren Apostoluen aurreskua, eta Zuberoako herri antzerkian inspiratutako Turko eta Kristauen arteko Pastoralak osatuko dute egitaraua. Azken hau, Muriska, 1989an estreinatutako lana eta Argia taldearen ibilbidean mugarri dena, ia hogeitabost urte ondoren eszenaratuko da berriz.

Argia: Besta Berri
2013ko maiatzak 18, larunbata, 20:00etan
Eibar, Coliseo antzokia
Sarrera: 10 €  – Sarrerak salgai Kutxabank-en eta Coliseoko txarteldegian Astelehenetan (19:00-20:00) eta ostiraletan (21:00-22:00).

Argia Besta-Berri-kartela