Kategorien artxiboak: Protokoloak

Gipuzkoako urrezko dominaren ezpata-dantza 2013

Nestor Basterretxea, Euskaldunon Egunkaria eta Egin omendu ditu bart Gipuzkoako Foru Aldundiak urrezko dominaren bidez. Eta ohi bezala, ezpata-dantza egin dugun ekitaldian. Gipuzkoako hainbat herritako ezpata-dantzariak bildu ginen Gipuzkoa plazan ezpata-dantza bakarra osatuz.

2013-09-26_Donostia-ezpata-dantza-urrezko-domina_IL_7792

Andoaingo Urki, Tolosako Udaberri, Añorgako Arkaitz, Beasaingo Aurtzaka, Debako Gure-Kai, Elgoibarko Haritz eta Eibarko Kezka dantza taldeetako dantzariak, Eibarko Usartza txistulari taldeko musikariak, eta Donostiako Argia dantzari taldearen zuzendaritzarekin osatu dugu ezpata-dantza.

2013-09-26_Donostia-ezpata-dantza-urrezko-domina_IZ_0165

Omendu, gonbidatu eta ikusle artean, jendetza bildu da Diputazioaren aurrealdean, eta tarte batzuetan lekuz justu xamar ibili bagara ere, horrek berak berotasuna eman dio dantzari. Omenduen aurrean ezpata-dantza dantzatu dugun unean ikusmin handia sortu da, eta une hunkigarria izan da. Ondoren, Diputazioko ate nagusiaren aurrean egindako zubitik pasaz sartu dira jauregira omendu eta gonbidatuak.

2013-09-26_Donostia-ezpata-dantza-urrezko-domina_IZ_0217

Kezkakoontzat oso polita izan da omenduen artean gure taldeko txistularia izandako bat ikustea. Iñaki Iriondo Kezka dantza taldeko kidea izan zen hainbat urtez. Egin-eko erredakzio buru izan zen Iñaki eta itxitako egunkariaren ordezkaria eta hizlaria izan da ekitaldian.

2013-09-26_Donostia-ezpata-dantza-urrezko-domina_IL_7838

Hona hemen parte hartu duten dantzarien zerrenda. Ezpata luzeekin: Ane Astigarraga, Larraitz Zialzeta, Carlos Gomez, Ainara Aizpurua, Aiora Arregi, Ane Egibar, Sergio Garcia, Andoni Alonso, Koldo Antolinez, Jon Arregi, Aritz Brosa, Garazi Artetxe, Xabier Artola, Julen Uranga, Miren Izagirre, Ilazki Azaldegi, Izar Sarriegi, Amaia Albisu, Josune Arakistain, Larraitz Ostolaza, Eider Aldalur, Iera Larrañaga, Olaia Gabirondo, Jon Barruetabeña, Egoitz Blanco, Enrike Izagirre, Ander Garitagoitia eta Oihane Llorente. Ezpata txikiekin aritu diren azkendariak: Jokin Otamendi, Joseba Astarbe, Irati Kortabitarte eta Garikoitz Otamendi. Gidaria: Josu Garate. Buruzagia: Oier Araolaza. Txistulariak: Enrike Montero, Elena Perez, Asier Castelos eta Iñaki Orbegozo

2013-09-26_Donostia-ezpata-dantza-urrezko-domina_IZ_0246

Berrian, ekitaldiari buruz argitaratutako bideoan ezpata-dantza ageri da ia-osorik. Iñaki Zugastik, Arantza Uriguenek eta Iker Lazpitak egindako argazkiak:

Gimnastak, eskalatzaileak eta bakailao zaleak

Dantzari batentzat dagoen publiko zailenetako bat tokatu zitzaion aurrekoan Anderri. Pasa den azaroaren 17an, Ipurua Gimnasia taldeak antolaturik Gimnasia Erritmikoko IX. San Andres lehiaketa ospatu zen Eibarko Ipurua Kiroldegian. Euskal Herriko taldeez gain nazioartetik Bulgaria eta Errusiako taldeak izan ziren Eibarren. Gomazkoak diruditen “dantzari-akrobata-gimnasten” aurrean hanka altxatzen hastea ez da erronka makala. Ander Fernandezek jaso zuen ekitaldi horretan agurra dantzatzeko enbitea, eta bai erantzun ere.

2007-11-19_Patxi-Usobiagari-ontietorria-Felix-Morquecho
Handik bi egunera, hilaren 19an, astelehenean, Patxi Usobiagari ongietorria egin zitzaion Eibarko Udaletxean. Patxi kirol eskaladako munduko txapeldun izan da aurten 2. aldiz eta zoriontzeko antolatu zen ekitaldian agurra dantzatu zion Oier Araolazak.

Azaroaren 25an Eibarko Bakailao Kofradiak, urtero moduan kofradiakide berriak izendatu ditu. Aurtengo ekitaldiak 14. edizioa izan du eta kofradiakide berriak Euskadi Irratiko albistegietako zuzendari den Odile Kruzeta, J.D. Arrate eskubaloi taldea eta Cielito Eibarko Musika Banda izan dira. Josu Garateri tokatu zitzaion hauei agurra dantzatzea. Hiru ekitaldietan Usartza txistulari taldekoek jarri dute musika.

Azken aldiko protokolo batzuk

Hona hemen azken aldian izan ditugun protokolo batzuen berri:
Urtero bezala Balentziagaren omenezko ziklismo proba jokatu da Eibarren. Afizionatu mailako proba da eta irabazleak datorren urtean profesionaletan aritzeko aukera izango du. Proba apirilaren 1ean jokatu zen eta oraingoan Aiert Ibarbiari tokatu zitzaion irabazleari agurra dantzatzea, txistulariak berriz Usartzakoak aritu ziren.

Beste alde batetik, jakin badakigu apirilaren 14a  II. errepublika aldarrikatu zeneko eguna dela eta horretan ere Eibarko herriak garrantzi handia izan zuen berau izan baitzen estatu osoko lehen herria aldarrikapen horretan.

Oier Ibarbia aritu zen dantzari lanetan eta Andoni Altzibar eta Iñaki Barua Kezkako txistulariek lagunduta agurra dantzatu zitzaion Eibarko Untzaga plazan errepublikako banderari Ezker Batuak antolatzen duen urteroko ekitaldi horretan.
2007-04-19_Intxorta_IZ_8433

Intxortako Atea

Apirilaren 19an aldiz, Elgetako Intxorta mendian agurra dantzatu zuen Ekhi Zugasti Kezkako dantzariak. Bertan “Intxortako Atea” eskultura inauguratu zen han gerra zibilean izandako bataila odoltsuaren oroitzapenean. Jende andana bildu zen bertan,  gerran jardun zuten gudariak, politikariak, eta baita lehendakaria bera ere.

Udaberriko protokolo batzuk

Hona hemen azken aldian tokatu zaizkigun zenbait protokolo-dantzen aipamenak. 2006-03-02_memorial-Balentziaga1276 Apirilaren 2an Balentziagaren oroimenezko ziklismo proba jokatu zen Eibarren. Karrera garrantzitsua da afizionado mailan, eta jakinekoa da bertan irabazten duenak datorren urtean profesionaletan aritzeko urrats garrantzitsua ematen duela. David Rodriguez-ek irabazi zuen karrera eta Gaizka Arrizabalagari tokatu zitzaion agurra dantzatzea Usartza txistulari taldeak lagunduta.

Apirila Errepublikaren hilabetea izaten da, eta Eibarren ez dugu ahazteko II. Errepublika aldarrikatu zen lehen herria izan zela hau, eta beraz, horren inguruko ospakizunak ohikoak izaten ditugu. Aurten bi ekitaldi izan ditugu Errepublikaren inguruan. 2006-04-09_Errepublika-FelixMorketxo Batetik, apirilaren 9an, Ezker Batuak antolatu ohi duen Errepublikaren inguruko ekitaldia burutu zen. Adineko errepublikazaleei omenaldia egin eta Aiert Ibarbiak agurra dantzatu zuen Andoni Altzibar, Felix Elortza eta Iñaki Barua Kezkako txistularien laguntzarekin.

Aurten 75 urte bete dira II. Errepublika martxan jarri zenetik (1931ko apirilaren 14an ezarri zen, Eibarren bezperan 13an aurreratu baziren ere) eta hori gogorazteko plaka bat jarri zuen Eibarko Udalak Untzaga plazan. Hain zuzen ere gaur egun Untzaga Plaza dena Alfonso XIII plaza zen Errepublika iritsi bezperan, eta 1931ko apirilaren 14an Errepublikaren plaza izena jarri zioten. 75. urteurrenean, 2006ko apirilaren 13an, Udaletxean jarri zen plaka gertaera horiek gogoratuz eta plaka horren inaugurazioan Ekhi Zugastik dantzatu zuen agurra, Usartza txistulari taldearen doinuetara.

IMG_1293

Maiatzaren 13an ekitaldi berezia ospatu zen Eibarko Hezkuntza Esparruan. Txolarte elkarteak bere 10. urteurrena ospatzen zuen eta elkarte horren egiten duen lan bikaina eskertuz omenaldia egin zitzaien. Oier Ibarbiak dantzatu zuen agurra eta Jose Migel Laskurain Usartzako txistulariak jo zuen danbolina.

SAN ISIDRO 305
Maiatzaren 15ean, San Isidro egunez, Debabarreneko nezkariei harrera egiten zaie Arraten eta nekazarien eguna ospatzeko ekitaldiak izaten dira: meza, prozesioa, herri-kirolak, bazkaria. Aurten San Isidro prozesioan atera zuten lagunak izan dira protagonista, lehen aldiz lau emakume, lau baserritarrek eraman baitute santuaren irudia. Prozesioan laguntzen, eta elizara itzultzean agurra dantzatzen Enrike Izagirre ibili zen eta musikaren ardura Usartza txistulari taldearena izan zen.

Argazkietan klik eginez gero tamaina handiagoan, eta kasu batzuetan argazki gehiago ikusteko aukera duzue.

Ezpata-dantza Donostian

Gipuzkoaren alde lan garrantzitsuak egin dituztenak eskertzeko 2005eko Urrezko Dominak eman ditu gaur goizean Donostian Gipuzkoako Foru Aldundiak.

Eta han izan gara Eibar, Elgoibar, Deba eta Añorgako dantzari eta txistulari taldea, ekitaldi honetan ohikoa bihurtzen ari den ezpata-dantza egiten.

Espainiako gobernua eta Eusko Jaurlaritzaren artean Hitzarmen Ekonomikoa adostu zuten ordezkari politikoak omendu nahi izan ditu gaurkoan Gipuzkoako Foru Aldundiak. Urrezko domina jaso dute Carlos Garaikoetxea, Pedro Luis Uriarte eta Xabier Arzalluzek, Urrezko Plaka, hil osteko izaeraz, Jaime García Añoverosen sendiak.

Nahikoa lan izan dugu ostegun goiz batean ezpata-dantza osatzen. Zenbat piper eskolatik eta zenbat huts lanpostuetatik!

Usartza Eibarko Udalaren txistulari taldearen doinuetara, Elgoibarko Haritz, Eibarko Kezka, Debako Gure-Kai eta Añorgako Arkaitz taldeetako dantzariek jardun dugu.

Gaur goizeko ezpata-dantzan Arantzak ateratako argazki gehiago Kezka dantza taldearen flickr-eko txokoan aurkituko dituzue.

Udazkeneko protokolo batzuk

Udazkenean ere tokatu dira hainbat potrokolo lan eta hor ibili dira Kezkako dantzariak eskariei erantzunez.

Ipuruako Jubilauak


Urteroko ohiturari jarraituz Ipuruako Nagusien Egoitzak omenaldia egin zien bere adinekoei urriko azken igandean. San Pioko elizan meza eta mezatik irteeran Agurra dantzatu zien Ekhik adinekoei. Musikari Usartza Udalaren Txistulari taldeak jardun zuen. Ondoren hamaiketakoa eta datorren urterarte.

Ospittala


Azaroan berriz, San Andrez aurreko asteburuan San Andres egoitzan adinekoak zaintzen aritzen diren mojei egin zitzaien omenaldia, Eibarko Udalak antolatuta. Enrike joan zen Agurra dantzatzera eta txistulari Usartza taldekoak.

Bakailauaren kofradia

Hori ere urterokoa izaten da, eta makina bat urte daramatzagu Kezkakook Bakailauaren kofradiakoen ekitaldian Agurra dantzatzen. San Andres jaien inguruan izaten da hori ere, eta oraingoan Ospittaleko omenaldiaren egun berean egokitu zen, azaroaren 27an. Enrikek Ospittaleko lanak bukatuta egin zien harrera hainbat tokitatik etorritako kofradiei, baita busti ere, euria ez zen eta aparte ibili.

Elgetako bariantia

Otsailean deitu zuten Elgetatik bariantearen lehen harria jarri behar zutela eta dantzari bat eskatzen ekitaldi hartarako.
Herri lanak izan ohi direnerako azkar demonio bukatu dute bariante hori, eta azaro bukaeran, berriz ere dantzari eskaera etorri da, oraingoan inauguraziorako. Dantzari gazteentzat ezin egun okerragorik hautatu lan horietarako: azaroak 30a, San Andres eguna. Bezperako parrandaren ondoren, eguerdirako, Plazara Dantzararako altxatzea kostatzen bada, zer esanik ez goizeko 11.00etan Elgetan dantzan egin behar bada. Hori put… Eskakeo nabarmen bat alde batera utzita, azkenean bariante horri erabilera gehien emango diona -egunero pasatzen baita bide horretatik-, joan zen inauguratzera: Ekhi. Txistulari, Arantza, Ermukoa.

Emaitzak: lau potrokolo, eta bi dantzari, tarte baterako marroi hauetatik libre daudenak bina punturekin: Ekhi eta Enrike.

Balentziagaren oroimenezko karreran

Balentziagaren oroimenezko 34. txirrindulari proba entzutetsuan irabazleei agurra dantzatu genion atzo. Oier A.ri tokatu zitzaion eta Usartza txistularien bandak lagundu zuen.

Karrerako garailea Victor Garcia izan zen. Oihartzun handiko garaipena izaten da afizionatuen mailan Eibarko karrera hau eta irabazleak hurrengo urtean profesionaletara pasatzeko urrats garrantzitsua ematen du. Eibarko Club Ciclistak antolatutako karrera hau irabazitakoak dira besteak beste Oscar Freire (1997), Unai Osa (1996), Claus Moller (1995), José Luis Rubiera (1994) edo Julian Gorospe (1981).