Soka-dantza esan diogu hainbat urtetan argi utzi nahirik sokan dantzatuko dugula, baina XX. mendean zehar gehien erabili izan den izena dantza hau izendatzeko aurreskua izan da. 1994ko ekainaren 24an 25 urteko hutsunearen ondoren berreskuratu zen aurreskua San Juan egunean Eibarren eta 30. aldiz egingo dugu beraz 2023an. Ekainaren 24an, 23:30ean Untzaga plazan izango da, Usartza txistulari taldea eta Kezka dantza taldearen eskutik eta Eibarko udalaren laguntzarekin.
Astebete pasa dugu eguraldi iragarpenak egunero, minutuero begiratzen. Biharamunerako euriteak iragarri eta eguna iristean sargori bai, baina euri tantarik gabe pasatzen zihoazen egunak. Bezperako iragarpenean euritea aurreikusten ziren, baina eguna etorri eta ateri egiteko itxura zeruak.
Soinu ekipoa eta mikrofonoak non jarri erabakitzeko orduan, goizean, txaparrada mardula, iragarri gabekoa. Arratsalderako zalantzakoa, baina badaezpada aterpera jotzea erabaki dugu.
Dantza saioa Errebal Plazan egingo dugula iragarri dugu eta hasi zaizkigu kexak iristen. “Ez du euririk egingo! Hobeto da plazan!”. Erabakia hartuta dago eta ez du atzera bueltarik. Eskerrak, behingoagatik asmatu dugu. Emanaldi ordua baino apur bat lehenago lehertu da ekaitza eta zaparrada mardulak bota ditu. Ekipoa plazan montatu izan bagenu sarraskia gertatuko zen eta emanaldia bertan behera utzi beharra.
Errebal Plaza ez da plaza irekia, baina plazaren sentsazioari asko hurbiltzen zaio eta baditu bere abantailak: aterpea eta ekipamendu teknikoa, adibidez. Akustikoki dituen zailtasunei neurria hartzen doaz teknikariak eta Walter eta Mikelen eskutik musikariek merezi bezain txukun entzun dira doinuak.
Kabalkaden tankera eman nahi izan diogu ekitaldiari eta beraz, kabalkadetan ohikoa den moduan Galtxetaburu martxaren doinura sartu eta atera gara Errebal plazara dantzariak.
Lapurdi, Nafarroa Beherea eta Zuberoan inauteri, kabalkada zein libertimenduetan egiten diren dantza sorta bat plazaratu dugu guztiok batera. Dantza-jauzi tankeran ofizio eta jokoen dantzak direnak batetik, zapatagin-dantza eta buhameak kasu.
Dantza-jauzi tankerako beste bi dantza berezi ondotik: marmutx eta xinple.
Antxoriz dantza-jauzia, era honetako dantzetan ohikoa den moduan zenbait segidaren pilaketaz osatua.
Kaskarot martxa eta makil-ttipi ondotik, exkotixetik bolant-dantza pasa gara.
Zuberoako makila-dantzak, dantza-jauzi eran egiten dena, zein Gipuzkoan eta Bizkaian txakolin eran egiten dena egin dugu gero.
Besta Berriko martxa, fandangoa eta dantza-luzerekin osatu dugu saioa.
Musika errepertorio ederra osatzen dute Iparraldeko dantza sorta hauek eta musikari talde ederra aritu da errepertorio horretako doinuak aireratzen: Adolfo Jainaga (eskusoinua), Andoni Riaño (tronpeta, gaita), Ekhi Zugasti (saxofoia, gaita), Iraide Ansorena (perkusioak), Iñaki Barua (atabala), Maialen Araolaza (perkusioak), Pablo Zubiaurre (tuba), Hiart Zugasti (flauta), Josu Agirre (kitarra), Amaia Baglietto (txirula), Roberto Altzerreka (txirula).
Eguraldia zoro xamar dabil azken asteetan eta euri arriskua dagoenez arratsalderako Eibarko Dantzari Eguna aterpean egingo dugu gaur. Arratsaldeko 19:30ean Errebal plazan izango Kezka dantza taldearen ikasturte bukaerako dantza-emanaldi berezi hau. Kezka dantza eskolan aritzen diren umeak eta Kezka dantza taldeko dantzariak eta musikariak aurten prestatu dituzten dantzak eskainiko dituzte bertan.
Iparraldera begira jarri gara aurten ere Eibarko Dantzari Egunean, eta Lapurdi eta Nafarroa Behereko dantza-sorta bat prestatu dugu Kezka dantza eskolako eta taldeko dantzariok 2012ko esperientzia berrituz. Inauteri eta Besta Berri festetan egiten diren zenbait dantza eskainiko ditugu.
Musikari talde ederra arituko da errepertorio horretako doinuak aireratzen: Adolfo Jainaga (eskusoinua), Andoni Riaño (tronpeta, gaita), Ekhi Zugasti (saxofoia, gaita), Iraide Ansorena (perkusioak), Iñaki Barua (atabala), Maialen Araolaza (perkusioak), Pablo Zubiaurre (tuba), Hiart Zugasti (flauta), Josu Agirre (kitarra), Amaia Baglietto (txirula), Roberto Altzerreka (txirula).