Horixe dio Eibarko kaldereroen konpartsak abesten duen abestietako batek. Izan ere bai, horrela iritsi ziren kaldereroak herrira 1991an, gerra aurreko konpartsa hura berreskuratu eta Estaziño kaletik gora kalejiran irten aurretik.

Argazkia: Iñaki Zugasti – dantzan.eus CC BY-SA

Urteak dira, ordea, taldea Urkizun batzen hasi zela eta aurten ere iturri aurrean elkartu ginen denok, otsailaren 24an, barixaku erregularrean; Lagun taldea, Txolarte, Jainagaren trikitixa eskola, Ustekabe fanfarea, Untzagako egoitza, Kaleetan kantuz, Kezka dantza talde eta dantza eskolako kideak eta bere kasa hurbiltzen zaizkigun hainbat lagun bildu ginen hain zuzen ere, eta handik Untzagarainoko bidea egin genuen eibartar ugari kaleen bazterretan batzen ziren bitartean. Ederra giroa!

Argazkia: Iñaki Zugasti – dantzan.eus CC BY-SA

Argazkia: Iñaki Zugasti – dantzan.eus CC BY-SA

Zartagin eta mailu hotsek, kantu eta dantzekin batera girotu zuten kalejira eta Hartzak ere bereganatu zuen, nola ez, ikusleen arreta. Untzagara iritsitakoan, Eibarko rugbiko neskek pregoia indartsu bota eta Hartzaren dantzarekin amaitu genuen Kaldererook 2016ko lana.

Argazkia: Iñaki Zugasti – dantzan.eus CC BY-SA

Argazkia: Iñaki Zugasti – dantzan.eus CC BY-SA

Argazkia: Iñaki Zugasti – dantzan.eus CC BY-SA

Ramon Saizarbitoria idazle eta soziologoa omendu du Gipuzkoako Foru Aldundiak urrezko dominaren bidez 2016 urtearen hondarrean. Sari honekin bere lana eta euskara batuaren alde egindakoak eskertu nahi izan dizkio Aldundiak. Ezpata-dantzariek egin ziote harrera omenduari abenduaren 15ean Donostian egin zen ekitaldian, ohi moduan Gipuzkoako ezpata-dantza eskaini baitzioten probintziako hainbat txokotatik hurbildutako dantzariek.

Argazkia: Felipe Loiola – dantzan.eus CC BY-SA

Argazkia: Iñaki Zugasti -dantzan.eus CC BY-SA

Gipuzkoa Plazan, Foru Aldundiaren atarian, burutu zen ezpata-dantza. Bertan, Ahaldun Nagusia ondoan zuen Saizarbitoriari parez pare hurbildu zitzaion ezpata-dantzarien taldea Usartzako txistularien doinura. Zubia egin eta azkendariek ezpata txikiak dantzatu zituzten idazlearen aurrean. Etorritako bidetik itzultzen hasita, ganberadun zubia egin zitzaion Aldundiko eraikinaren atean.

Argazkia: Iñaki Zugasti – dantzan.eus CC BY-SA

Argia dantza taldearen zuzendaritzapean Arkaitz (Añorga), Aurtzaka (Beasain), Haritz (Elgoibar), Gure-Kai (Deba), Sahatsa (Azkoitia-Azpeitia), Urki (Andoain) eta Kezka (Eibar) dantza taldeetako dantzarien eta Usartza (Eibar) txistulari taldeko musikarien artean osatu da ezpata-dantza. Azkendari lanetan Joseba Astarbe, Gari Otamendi, Miren Hazas eta Igor Baroja aritu ziren eta Josu Garatek hartu zuen taldearen buruzagitza.

Argazkia: Iñaki Zugasti – dantzan.eus CC BY-SA

Felipe Loiola eta Iñaki Zugastik egindako argazki galeria zabalago bat ikus dezakezue hemen:

Hamarrekoa (diezmo) jasotzea ohikoa izan da eske-errondetan. Hamarrekoak jasoz hamarrekoa osatuko dugu aurten koko-eskean, 2008an abiatu baikenuen, eta beraz, hamargarrenez aterako dira koko-dantzari eta koko-marruak koko-dantzan eta koko-eskean 2017 urte honetan. Otsailaren 18an, larunbat honetan aterako dira koko-dantzak maskarada-festan.

Gorosta eta Mandiola

Eibarren 100 baserritik gora dira, eta lau urtetan antolatuta, ziklo olinpikoak behar izaten ditugu baserri berdinera itzultzeko. Hirugarren koko-zikloan sartuta, bigarren ibilbidea, Gorosta eta Mandiolako baserriak hartzen dituena izango dugu helburu aurten.

Koko-dantzak, 2016-01-30. Argazkia: Felipe Loiola – Kezka dantza taldea CC BY-SA

Goizeko 8:30ean lehen agerraldia Merkatu Plazan egin ondoren, ohi bezala, bi taldetan antolatuko gara. Talde bat Azitaingo industrialdera hurbildu eta bertatik Eskaregi, Agirreazpikoa, Azaldegigainekoa, Nagiorbe, Boneta, Sagarbieta, Azpiri, Mandiolagainekoa eta Mandiolazpikoa bisitatuko ditu. Bitartean beste taldeak Asua, Gisasola, Ixua, Usartza, Akondia, Berretxinagoikoa, Iturragoikoa, Iturrabehekoa eta Arlaban. Matsaria-Asolabarri aldean bukatuko dira baserrietako bisitak.

Koko-dantzak Eibarko kaleetan

Iluntzean, 19.00etan Anbulategiko parkean elkartuko gara koko-konpartsa eta koko-festan parte hartu nahi duten guztiak, eta Mauxitxa txarangaren doinura erdiko kaleetan ibiliko gara.

2017ko Otsailak 18, larunbata. Koko-dantzak:

• 8:30 Merkatu plazan lehen agerraldia
• 9:00 – 15:00 Koko-dantzak eta koko-eskea Mandiola eta Gorosta aldeko baserrietan.
• 19:00-21:00 Zuloagatarren, Toribio Etxebarria, Untzaga, Kalberton eta Plaza Barria kale eta plazetan koko-dantzak Mauxitxarekin.