Maiatzeko azken asteburuan ospatuko da Eibarren 50. Euskal Jaia. Maiatzaren 29ean ostiralean hasi eta igandera bitartean kontzertu, azoka eta abarrek beteko dute herria, eta dantzak ere izango du bere tokia noski, toki berezia gainera. Euskal Jaiaren baitan antolatzen da Ezpalak dantza tradizionalaren nazioarteko jaialdia Eibarren eta bertan soka-dantzak izango dira aurtengo gaia Bizkaia, Araba, Lapurdi, Nafarroa, Gipuzkoa eta Turkiako soka-dantzen erakustaldiarekin.

50. Euskal Jaia izanik Eibarren dantzari aritutako dantzariei gonbidapena egin zaie elkarrekin dantzara ateratzeko, eta igande eguerdian hainbat belaunalditako dantzariek beteko dute Untzaga plaza.

Hainbat belaunalditako dantzariak plazara

Dantzari dantzara! lelopean egin zitzaien deialdia belaunaldiz belaunaldi Eibarko dantza taldeetan aritutakoei eta erantzuna ezin hobea izan da. Txiki, gazte eta nagusi, dantzan jarraitzen dutenak eta urtetan dantzarik egin gabekoak, 350 dantzari inguru elkartuko dira datorren igandean Iribasko ingurutxoa eta Imotzeko esku-dantza elkarrekin dantzatzera. Entseguak urtarrilean hasi ziren eta jo eta ke aritu dira prestaketa lanetan.

Argazkia: Iñaki Zugasti / dantzan.eus CC BY-SA

Soka-dantzak Ezpalak jaialdian

Ezpalak jaialdiari dagokionez, soka-dantzek hartuko dute  protagonismoa  larunbatean, arratsaldeko 19:00etatik aurrera egingo den 10.edizio honetan. Eibarko Kezka dantza-taldeak San Joan eguneko soka-dantza berritua plazaratuko du lehen aldiz eta honez gain Lapurdiko Lekorne herriko Urtsuko xoriak taldea, Iruñeko Duguna taldea, Arabako Larrea herriko dantzariak, Bizkaiko Garai herriko dantzariak eta Turkiako Ankarako Baskent Unibertsitateko dantza-taldea izango dira Untzaga plazan tokian-tokiko soka-dantzak erakusten.

50. Euskal Jaia Eibarren (1965-2015)

1965ean egin zen lehen Euskal Jaia Eibarren Arrate Kultur Elkartearen eskutik eta ondoren Eibarko Klub Deportiboak hartu zuen berau antolatzeko ardura. Gaur, asteazkena, maiatzaren 27an, Coliseo antzokian Eibarko 50. Euskal Jaiaren programaren, dokumentalaren eta liburuaren aurkezpena egingo da.

Hona Eibarko 50. Euskal Jaiko programa:

Eibarko 50. Euskal Jaia

Ostirala, maiatzak 29

• 17:00etatik 19:00etara: Kalian Jolasian Bizikleta plazan.
• 20:00etaik 4:00etara: Kontzertuak Makala, Espaloian, Hesian eta eMePeBo5t taldeekin Untzaga plazan.

Larunbata, maiatzak 30

• 10:00etataik 14:00etara: Baserritar eta artisau azoka Toribio Etxeberria kalean.
• 19:00etan: Ezpalak Nazioarteko Jaialdia (Lapurdiko Lekorne herriko Urtsuko xoriak taldearekin, Iruñeko Duguna taldearekin, Arabako Larrea herriko dantzariekin, Bizkaiko Garai herriko dantzariekin, Turkiako Ankarako Baskent Unibertsitateko dantza-taldearekin eta Eibarko Kezka dantza taldearekin).
• 21:30etan: Kantu afaria Untzaga plazako karpan.

Igandea, maiatzak 31

• 12:00etan: txistulari eta dantzarien kalejira Urkizutik Untzaga plazara.
• 12:30etan: Eibarko aspaldiko eta gaurko dantzarien emanaldia.
• 13:00etan: Erromeria Jainaga eta Narbaizarekin.
• 14:00etan: Herri-bazkaria Untzaga plazako karpan.
• 17:00etan: Erromeria Patxi eta konpainiarekin.
• 19:00etan: Larrain-dantza Untzagan.
• 20:00etan: Larrain-dantza Depor parean.

Maiatzaren 3an Mandiola auzoko Santa Kurutz ermitan soka-dantza egin genuen Kezkako dantzariok Usartza txistulari taldeak eta auzoko baserritarrek lagunduta. Jai giro ederrean pasatzen dute urtero goiza bertara hurbildutakoek, trikitixa eta pandero, txistu eta danbolin, txorizo eta odoloste egosi, joko, algara eta dantza!

Miren Hazas eta Oihane Llorentek hartu zituzten sokaren muturrak, lehenak aurresku lanak eta bigarrenak atzeskuarenak egin zituzten. Olaia Gabirondo eta Olaiz Agirrebeñak zerbitzariarenak bete zituzten. Mandiola auzoko baserritarrak izan ziren, urtero bezala soka osatu zutenak.

Desafioa, aurreskuak eta abarrak amaituta dantza-soltean fin ibili ziren Santa Kurutzera hurbildutako auzokideak.

Usartza txistulari taldeko German Ereña, Javier Zorrakin, Ainhoa Urkizu eta Enrike Montero izan ziren goizari berari eta soka-dantzari doinua ipini ziotenak. Auzoko gazteek ere pandero eta soinuak hartuta animatu zuten goiza. Nagusiak, aldiz, bertara hurbildutako guztiontzat txorizo eta odoloste egosiak prestatu zituzten goizean goizetik.

Hona hemen Iñaki Zugastik egindako argazki sorta:

• Eibar: Santa Kurutz 2015 Soka-dantza [argazkiak]

Gipuzkoako Foru Aldundiak eman dituen Urrezko plaken ekitaldian ezpata-dantzan izan gara martxoaren 28an Donostiako Kursaalean. Foru Aldundiak Gipuzkoako Urrezko Plaka 40ko, 50eko eta 60ko hamarkadetan Espainiar Estatuko herrietatik Gipuzkoara etorritako pertsonei eman zien. Ekitaldia hasi aurretik, Kursaaleko sarrerako aterpean egin zitzaien harrera ezpata-dantzarekin.

Omenduen ordezkariek, Gipuzkoako Diputatuek eta bertara hurbildutako jendeak izan zuen ezpata-dantzaren zubiak eta azkendarien lanak bertatik-bertara ikusteko aukera. Horiek eginda, omenduen aurrean azken zubia egin, eta Kursaalerako sarrerako atean egin zitzaien zubia, denak ekitaldira sar zitezen.

Urrezko plakaren ekitaldiko ezpata-dantza hau Gipuzkoako hainbat herri eta taldetako dantzariekin osatzen da, eta Argia dantzari tadearen zuzendaritzarekin eta Usartza txistulari taldearen doinura Elgoibarko Haritz, Debako Gure-Kai, Andoaingo Urki, Añorgako Arkaitz eta Eibarko Kezka dantza-taldeetako dantzariek parte hartu genuen.

Dantzariak: Oihane Llorente, Olaia Gabirondo, Enrike Izagirre, Luken Aranburu, Amaia Rodriguez, Olaiz Agirrebeña, Josu Garate, Ander Garitagoitia, Jone Saez, Miren Hazas, Maitane Fariñas, Ekhi Zugasti, Maider Otaola, Amaia Loiola, Eire Vila, Maialen Astigarraga, Jon Lizarralde, Egoitz Irazabalbeitia, Joseba Astarbe, Ainara Aizpurua, Jokin Otamendi, Naiara Ollo, Gari Otamendi, Andoni Alonso, Asier Garmendia, Jon Arregi, Koldo Antolinez, Igor Baroja, Andoni Iriondo, Maialen Baroja, Ixone Juaristi eta Jugatx Juaristi. Txistulariak: Enrike Montero, Elena Perez, Asier Kastelos eta German Ereña.

Hemen Felipe Loiolaren argazki sorta:

• Urrezko Plaka 2015: Ezpata-dantza Kursaalean [argazkiak]