Hileko artxiboak: apirila 2012

Nori egiten diogu dantza?

Euskal Herriko Itzuliaren etapa irteera Eibarren. Lehen Euskal Bizikletarekin bezala, orain ere, etapa irteeran agurra dantza egiteko eskaera egiten digute. Badira zortzi-hamar urte protokolo hori egiten dugula. Handik eta hemendik etorritako txirrindulariak pedalei ematen hasteko prest zeudela, haien aurrean jarri, eta agurra dantzatzen genien lehen urteetan.

2006-05-30_Euskal_Bizikleta-irteera77
Euskal Bizikletaren etapa irteera Eibarren (2006).

Orain urte batzuk omenaldi bat egin nahi izan zioten zendu berri zen antolatzaile taldeko kide baten familiari, eta familia, antolatzaileak eta agintariak jarri ziren txirrindularien aurrean. Harrezkero horrela segitzen dute. Omenaldirik ez, baina agintari eta karrera antolatzaileak jartzen dira txirrindularien aurrean aurreskuaren ohorea jasotzeko.

Aurten ere halaxe gertatu da. Josu Garate joan da protokoloarekin kunplitzera, eta Usartzako txistulariak prest albo batean.

Dantzan hastera zihoanean, karrerako zuzendaria eta kirol zinegotzia, azafata pareak lagunduta, jarri dira zintaren aurrean aurreskua jasotzeko. Txirrindulariei bizkarra emanez, eta dantzaren eskaintza beraientzat bailitzan jokatuz.

Karrera antolatzen hainbat lan eta diru jartzen dituztenen ordezkari dira biak, konforme. Baina ez zaigu iruditzen horiek direnik ekitaldiaren protagonistak. Protagonistak txirrindulariak dira. Eta inori dantza egitekotan, iruditzen zaigu txirrindulariei egin behar diegula.

Argazkiak Mikel Larreategin twitter-etik hartutakoak dira.

Dantza Coliseoan: Traspasos eta Mikel Urdangarin: Nora

Traspasos eta Mikel Urdangarin: Nora

2012ko apirilak 13, ostirala, 20:30ean

Traspasos-en dantza eta Mikel Urdangarin-en musika elkartzen dira Nora izeneko ikuskizun honetan. Urdangarinen hamar kanta hartu eta hamar dantza bihurtu dituzte Traspasos konpainiko dantzariek. Nika Bitchiashviliren biolina eta Koldo Uriarteren pianoaren laguntzarekin osattzen da Mikel Urdangarin eta Traspasosen bidaia hau.

Mikel Urdangarinen kanta bat, ‘Panderoaren gizona’ hartu eta koreografia jarri zion Traspasos-ek. Mikeli erakutsi, eta musikak dantzarekin hartzen zuen dimentsioaz liluratuta lanarekin jarraitu eta ikuskizun osoa prestatzeari ekin zioten.

Traspasos 1986an sortu zen Gasteizen, dantza estudio eta taller moduan, eta 1990ean bertan abiatu zen dantza konpainia profesionala. Hainbat ikuskizun ekoiztuz dantza garaikidea ezagutzera ematen lan handia egin du Traspasos-ek.

Traspasos eta Mikel Urdangarin: Nora

  • Koreografia-zuzendaritza: GemaEspinosa
  • Musikariak:
    • Mikel Urdangarin (ahotsa eta kitarra)
    • Nika Bitchiashvili (bibolina)
    • Koldo Uriarte (teklatuak)
  • Dantzariak: Idoia Blanco, Ainara Biteri, Nagore Sagardui, Eider Mendizabal.
  • Eszenografia:Javi Ulla & Traspasos
  • Argiztapena: Javi Ulla
  • Soinua: Anselmo Calleja
  • Musika: Mikel Urdangarin

Iraupena: 75 minutu.

Traspasos eta Mikel Urdangarin: Nora
2012ko apirilak 13, ostirala, 20:30ean
Eibar, Coliseo antzokia
Sarrera: 7