Behin loa berreskuratuta, Iñaki Zugastik egindako argazki aurrerapena hemen.

Hotz galanta pasa dugu Italian, baina ederra zegoen benetan Rocca Grimalda eta haren inguruak elurrak zurituta.

Bidaia primeran joan da. Uste baino errazago egin dugu joan-etorria, ederki ostatatu gaituzte Ovadako hotelean, bapo jan dugu garbantzu, farinata, pasta eta abarrekin lepo egin arte, eta dantzan eta festan gozatu dugu, bai koko-dantzetan eta baita courante eta schottis-etan ere.

Frakaso txiki bat izan dugu hala ere… Pum-ba-pum-ba-pum-ba-pa eta Lou temp de l’amorosa, Italianoz kantu bat beraientzat propioa horrelako mimoarekin prestatu, eta gero, estimatu ez! Aiiii……

Ikusi ditugu Nafarroa Beherekoak diruditen dantzariak, ikusi dugu Miel Otxin-en kopia sutan kiskaltzen eta ikasi dugu “La Lachera” hori “La Lakera” ahozkatzen dela…

Aurrerago egingo dugu kronika txukunagoa. Oraingoan argazki adelanto honekin konformatu behar.

Gaur arratsaldean abiatuko da Kezka dantza taldeko “koko-dantzak Roccara” espedizioa Italiaruntz. Asteburuan Rocca Grimaldan izango gara, bertan ospatzen den La Lachera inauterian koko-dantzak aurkezten.

Piamonteko herri txiki bat da Rocca, eta izenari ohore egiten dio, haitz handi batean magalean eraikitako herria baita. Inauteri tradizionala, zahar eta eder bat ospatzen da bertan, La Lachera. Gaur bertan,  ostiralean, abiatu dituzte La Lacherako ekitaldiak, eta igandera bitartean iraungo dute.

Lache, Trapulin edo ezkonberriak pertsonaiek parte hartuz, etxez-etxe ibiltzen dira La Lacherako pertsonaiak dantzan eta eskean. Igandean izango da ekitaldi nagusia Rocca Grimaldan. Egun horretan herriak dituen biztanleak bikoiztu egiten dira kanpotik etorritakoekin. Kalejira eta dantza festa horretan eskainiko ditu Kezka dantza taldeak Eibarko koko-dantzak.

Zuriz margotu zitzaizkigun mendiak Koko-dantzen bezperan eta goizean, eta koko-eske zuria izan dugu aurtengoan. Iñaki Zugastiaren argazki batzuk, aurrerapen txiki bat. Etorriko dira gehiago aurrerago…

Egunez Arrate balleko baserrietan eta Gorostako zenbaitetan aritu ginen dantzan, kantuan eta eskean.

Arratsaldez berriz, La Lacherako inauteria eta Mauxitxa txarangarekin Eibarko  kaleetara iritsi ziren inauteriak.

Eta gaur Italiaruntz abiatzen gara!