Ohi bezala, 2009ko uztailaren 25ean, Santiago egunez, festak ospatu dira Goimendi auzoan eta soka-dantza egin dugu bertan. Eibar, Elgeta eta Bergara artean kokatuta dago Goimendi, eta baserri batzuk Elgetako luirretan daude eta beste batzuk Bergarako lurretan. Jai-gunea Azurtzako ermita aurreko plaza ederra izaten da.

Hasierako sokan Elgetako alkatea, Oxel Erostarbe, ondoren Joxe Agirrekin bertsotan aritzera etorri zen Jesus Mari Irazu bertsolaria, eta Ander Agirrebeña trikitilaria eta jaien antolaketa batzordekoa sartu ziren. Josu Garate aurreskulari, Oier Ibarbia atzesku, eta Enrike Izagirre eta Oier Araolaza zerbitzari lanetan. Andoni Altzibar eta Iñaki Barua aritu ziren txistua, danbolina eta atabalarekin.

Iñaki Zugastik eta Ainhoa Larrañagak egindako argazki gehiago flickr-en.

Eibarko Unibertsitate Laboralak 40 urte bete dituela eta urteurren ospakizunak burut dira azken hilabeteotan. Ekainaren 27an, Unibertsitateko ikasle izandako ehunka lagun bildu ziren bertan eta ekitaldi horretan Arrateko ezpata-dantza eskaini zuen Kezkak.

Argazkiak: Iñaki Zugasti.

Maiatza bukaeran, ekaina hasieran, Eibarko Klub Deportiboaren Finalista eguna ospatzen da Arraten. Kezka dantza taldea elkarte honetan sortu zen orain 51 urte. Pilota partidak, roll-ski igoera, mendizaleenn igoera, eta beste hainbat ekitaldi izaten dira deportiboaren eguna ospatzeko Arraten.

Felix Elortzak txistua jo, Iñaki Baruak atabala eta Enrike Izagirrek agurra dantzatu zien mendiko gailurren dominak jaso zituzten mendizaleei.

Maiatzaren erdi inguruan ospatzen dira Letra Galegoen jaiak Eibarren, Urkizun. Kezka dantza eskolako gaztetxo talde batek soka-dantza egin zuen bertan, maiatzaren 17an hain zuzen ere.

Bi urtetik behin Nazioarteko Folklore Jaialdia antolatzen dute Deban Gure-Kai dantza taldeko lagunek. Andoni Iriondo eta Nere Arostegik gidatzen duten taldeak jaialdi ederra prestatzen du Debako zumardian jartzen duten karpan eta debarek erantzun beroa ematen diote ahaleginari.

Aurten Txinako taldea bat izan dute gonbidatu, Portugaleteko folklore jaialdirako etorri den Guizhou-ko hego-ekialdeko taldea. Kezka dantza taldeari jaialdian Arrateko ezpata-dantza aurkezteko gonbidapena egin zigun Gure-Kaik. Debako taldeak, Elgoibarko Haritz-ekoen laguntzarekin, bere garaian elgoibartarrek Galdakaoko Andra Marirekin ikasitako Auritzeko ingurutxoa egin zuten lehen partean. Bigarren partean jotaren inguruan aritu ziren, Gipuzkoa, Bizkaia, Araba, Lapurdi eta Nafarroako jota desberdinak dantzatuz.

Jaialdian aipamen eta oparientzat tartea ere izan zen. Gure-Kaik Arrateko ezpata-dantzaren margo-lan eder bat oparitu zion Kezkari, Treku margolariak egindakoa. Gure-kaiko dantzariek jaialdiaren antolaketan eta taldearen ibilbidean horrenbeste lan egiten duten Andoni Iriondo, Nere Arostegi eta Nekane Goikoetxeari bere esker ona adierazi zieten.

Hona Iñaki Zugastik egindako argazki batzuk.