Aipatu genuen apirilean, aurten Eibarko Klub Deportiboko dantza taldea, gerora Kezka izena jaso zuena, sortu zenetik 50 urte betetzen zirela. Urte bete-betea izaten ari gara (Inauterietan koko-dantzak, Axeri-boda
ikuskizuna, York-en Sword Spectacular jaialdia, Utahkoen bisita,… )
eta propio urteurrenari begira ekitaldi gutxi antolatu ditugu.
Apirilaren 13an Arraten ospatu genuen 50. urteurrena eta orain,
azaroaren 15ean, Kezkarekin elkarlanean dabiltzan zenbait talde lagun
gonbidatu ditugu elkarrekin jaialdi bat egiteko Coliseo antzokian.

“Koko-moko, sária bete moko” kantatu genuen aratusteetan,
koko-dantzetan, eta orain “Saria bete dantza” izeneko emanaldia
antolatu dugu. “Sária” otarra da Eibarren, eta “Coliseoa bete dantza”
egin nahi dugu datorren azaroaren 15ean.

Kezka & friends

Azken urteotan lagun izan dituen taldeetako batzuk gonbidatu ditugu gurekin batera dantzatu eta urteurrena ospatzera. Donostiako Argia, Galdakaoko Andra Mari, Iruñeko Duguna, Añorgako Arkaitz eta Elgoibarko Haritz taldeek emanaldi berezia eskainiko dute Kezka dantza taldearekin batera

Azken urteotako Kezka dantza taldearen dantza ibilbidean funtsezkoak izan diren eta gure laguntzat ditugun dantzari eta dantza taldeak gonbidatu ditugu jaialdirako. Denek eman dute baiezkoa eta poz handia dugu, gure jardueran erreferente izan diren eta diren taldeak dantzatuko baitira gurekin batera Coliseoan.

Saria bete dantza
Argia, Andra Mari, Duguna, Arkaitz, Haritz eta Kezka dantza taldeak
Eibar, Coliseo antzokia
2008ko azaroaren 15ean, 19.30etan

Antzokiek berez magia berezia badute, zer esan Antio moduko baseliza ederra antzoki bihurtuta? Ikuskizunik gabe ere gustura egon daiteke bat bertan eserita, harriei eta egurrei begira.

Antioko musika zikloaren 25. urteurrena ospatzeko “Ezpata-dantzak eta Ezteiak” ikuskizuna zuzendu zuen Juan Antonio Urbetz-ek irailaren 28an Antioko baselizan.

Kezkako dantzariok emanaldi berezi horretan Arrateko ezpata-dantza aurkezteko aukera izan dugu Enrike Montero eta Iñaki Baruaren txistu eta danborraren doinura. Irrintzi dantza taldearen Zumarragako ezpata-dantza eta Axeri-boda etorri ziren ondotik. Erritmo geldoaren indarra eta tradizioak distiraz berritzeko gaitasuna erakutsi zuten Irrintzikoek, eta zalaparta, dantza erritmo eroa eta tradiziozko doinuen edertasuna ekarri zuten Argiak gidatutako dantzari eta musikariek. Klima berezia eta ikusleak bero.

• Ezpata-dantza eta ezteiak [argazkiak]
• Axeri boda, ikuskizun ahaztezina (Patxitrapero)
• Ezpatadantzariak (Patxitrapero)
• La ezpatadantza guipuzcoana (Anton Arbulu)

Iñaki Zugastiren argazki sorta bat hemen:

Felix Bergara apaizak 40 urte bete ditu apaiz egin zenetik Azitaingo bere lagun eta auzotarrek omenaldia egin zioten pasa den irailaren 28an. Andoni Altzibar txistulari, Iñaki Barua atabalarekin, eta Enrike Izagirre dantzari, ezpata-dantza dantzatu zuten mezan eta Agurra eskaini zioten irteeran

Aspaldiko urteetan ohiko emanaldia du Haritz-ek Elgoibarko Aiastia auzoan, San Migel jaietan eskaini ohi duena. Iaz bezala, aurten ere beraiekin batera dantza egitera gonbidatu gaituzte elgoibartarrek.

Auzoko dantzariek, sanmigeldarrek hasi zuten emanaldia agurra dantzatuz. Ondoren Kezkako dantzariek Arrateko trokeo-dantza eskaini zuten eta bukatzeko Haritz dantzari taldeak Luzaideko dantza sorta eder bat.

Badira egunak gauzak okertzen hasi eta zuzentzeko modurik gabe zeharo makurtuta bukatzen dutenak. Aiastaia emanaldia ez zaie erraz ahaztuko bertan izan ziren Kezkako dantzariei. Aspaldiko aldrebesena gertatu zen.

Eskerrak argazkietan ez diren arazo horiek antzematen. Eta eskerrak gero Elgoibartarrek txukun egin zituzten beraien dantzak, eta emanaldiari duintasuna eman zioten.

Trokeo-dantzan Oier Ibarbia, Irune Orueta, Olaia Gabirondo, Eider Agirrebeña, Oihane Llorente, Unai Agirre eta Ainhoa Lendinez aritu ziren eta buruzagi lanak Luken Aranburu, Josu Garate, Irati Kortabitartek bete zituzten.