Orain pare bat aste pasa ziren inauteriak eta kaldereroak ere urtero bezala Eibarko kaleetan zehar ibili ziren beraien abestiak eta dantzak eskainiz. Kezka dantza taldeko dantzarien eta dantza eskolako ikasleez aparte beste dantza ikastaroetako ikasleak, Untzagako jubilauen egoitzakoak, Musika Eskolako ikasleak, Ustekabe fanfarreak eta Txolarte eta Lagun artea elkarteetako kideak parte hartu genuen. Gurekin batera aritu ziren koordinazio lanetan Etakitto, Pantxika astoa bere gurdiarekin batera, eta Jainagaren trikiti eskola.

Aurten Mauleko kaldereroak edo kauterak ere etorri zaizkigu Tokia Theatre antzerki taldearen eskutik eta iragarri bezala pasa den otsailaren 16an, ostiralarekin, arratsaldeko 19:30etatik aurrera kaldereroen jaia ospatu genuen.

Tokia Theatre antzerki taldea Kauterak ikuskizunarekin etorri zen Eibarrera. Zuzeneko musika, su-jokoak, mozorro ikusgarriak, hanka-luzeak eta
aktore talde profesional batek osatzen dute Kauterak ikuskizuna. Kalejiran zehar batu zitzaizkigun hartzarekin batera Eibarrera heldutako kauterak eta gure kaldereroen abesti eta dantzekin bat eginik heldu ziren Untzaga plazaraino.

Untzaga plazan beraien ikuskizuna eskaini ziguten han bildutako jende guztiari eta Urbat waterpolo taldeko jokalariek urteroko pregoia bota ostean azken kantu eta dantzekin bukatu genuen emanaldia.
Argazki guztiak ikusteko klikatu hemen

Argazkiak: Felipe Loyola

Aratusteetako ostiralean iritsi
ohi dira Kaldereroak Eibarrera, eta aurten ere halaxe egingo dute, otsailaren 16an,
arratsaldeko 19.30etatik aurrera. Kezka dantza taldearen ekimenez Hungariako
kaldereroen jaiak, kantuz eta dantzaz berrituko du tradizioa.

Aurten, gainera, bidaide bereziak
izango dituzte kaldereroek. Mauleko Tokia Theatre antzerki taldearen eskutik
Kauterak ikusgarria izango dugu Eibarren, kaldereroekin batera ostiral
arratsaldean. Zuberoako inauterietan agertzen diren pertsonaiak dira
Kauterak, eta hain zuzen ere, Kaldereroak esan nahi du Kauterak hitzak, beraz,
kaldereroen jaia ospatzeko beste modu bat ekarriko digu Tokia Theatrek
Eibarrera.

Kauterak, tradizioa berrikusiz

Mauleko Tokia Theatre taldearen Kauterak ikusgarria izango da
aurtengo Eibarko Kaldereroetako nobedade nagusia.  Zuberoako
maskaradetan ohiko pertsonaiak dira kauterak, kaldereroak. Tradizio
horretatik abiatuta kale ikusgarri berria prestatu du Tokia Theatrek.

Thierry Truffaut ikertzaileak inauterien inguruko ikuspegi aberatsa
eskaini die eta hortik abiatutako pertsonaia, tramankulu, izaki
beldurgarri, eta inauterietako osagai bitxiekin osatu da Kauterak.
Zuzeneko musika, su-jokoak, mozorro ikusgarriak, hanka-luzeak eta
aktore talde profesional batek borobiltzen du Kauterak ikusgarria.

Eibarren eskainiko duten emanaldian Kaldereroen kalejiran,
ibilbidean joango dira konpartsan sartzen Kauterak ikusgarriko
pertsonaiak eta eszenak. Untzagara iritsitakoan emanaldi ikusgarria
eskainiko dute bertan. Aipatu beharrekoa da
Kauterak ikusgarri hau Eibarren aurkeztu ahal izateko Euskal Kultur
Erakundeak (EKE) eskainitako laguntza berezia. Kezka dantza taldea,
Eibarko Udala eta EKEren elkarlanari esker izango da Eibarren Tokia
Theatreren ikusgarria.

Ibilbidea eta ordutegia

Hauxe izango da aurten egingo den ibilbide eta ordutegia:

• 19.30etan
  Kaldereroen elkartzea Urkizuk parkean.
• 20.00etan
  Urkizutik abiatuko dira kaldereroak Untzagaruntz.
• 20.15etan
  Kauterak bilduko zaizkie Kaldereroei Eibarko kaleetan
• Ibilbidea:
  Urkizu, Bittor Sarasketa, Estaziño, Errebal, T. Etxebarria eta Untzaga.
• 20.40etan
  Untzagan Kauterak ikusgarria
• 21.00etan
  Untzagan, aratusteetako pregoia
• 21.10etan
  Kaldereoen kanta eta dantzak.
• 21.15etan
  Hartzaren dantza, heriotza eta berpiztea.

Kaldereroen konpartsa ohiko pertsonaiek eta taldeek osatuko dute:

• Kalderero
  dantzari eta kantariak
• Kalderero
  musikariak
• Hartza
  eta domadorea
• Pantxika
  astoa eta kaldereroen gurdia

Urtero bezala herriko
hainbat taldek parte hartuko dute Kaldereroen
etorreran:

• Kezka
  dantza taldea
• Kezka
  dantza eskola
• Etakitto
  euskara elkartea
• Ustekabe
  fanfarea
• J.B.
  Gisasola Musika Eskolako ikasleak
• Jainagaren
  trikitixa eskola
• Txolarte
• Lagunartea
• Untzagako
  adinekoen egoitza

Antolaketa lanak:

•  Kezka dantza taldea
• Etakitto euskara elkartea
•  Eibarko Udala – Kultura Saila

Laguntzaile berezia:

• Euskal Kulturaren Erakundea (EKE)

1991an berreskuratu zen
Kaldereroen etorreraren ohitura Eibarren eta ordutik hutsik egin gabe izan
ditugu hungariako ijitoak aratusteetan. Baina aurretik ere, 1930eko hamarkadan,
atera ohi ziren kaldereroak Eibarren.

Ikusi ondoko loturetan Eibarko Kaldereroen inguruko hainbat kontu interesgarri:

• Iazko Eibarko Kaldereroen kronika
• Kaldereroak Eibarren, historia laburpena
• Eibarko kaldereroen kantak
• Tokia Theatre-ren bloga
• Kauterak ikusgarriaren inguruko informazio gehiago