Aurten bai, aurten eguraldia ere lagun izan dugu Arrate egunean eta Arrateko zelaiko floridadiaz gozatzeko
aukera izan dugu. Ohi bezala azken gaupaseroak oraindik zelaian zeudela
iritsi ginen Arratera. Azkar-azkar jantzi eta argazkiak egitera joan
ginen. Talde osoaren argazkia kosta
zitzaigun piskat egitea,

eta gero aurtengo lau gonbidatuena atera zuen
Felipek. Ezkerretik hasita Mikel Legorburu, Abel Iriondo, Lourdes
Odriozola eta Jon Lizarralde. Zelako lau dantzari!!
 

Meza nagusia hasita zegoen, baina luze jo ohi du Arrate egunekoak, eta garaiz ibili ginen. Baita argazki gehiago egiteko ere. Konsagrazio ostean elizara sartu zen aurten Aiertek gidatu duen ezpata-dantzarien taldea eta Lourdes eta Abelek Jaunaren aurreko ezpata-dantza eskaini zuten. Eliza urtero bezala bete-bete eginda zegoen.  Ezpatak altxa, zubia eta kalera berriz.

Iazkoaren aldean, prozesioa genuen nobedadeetako bat, eta ikusteko
zegoen ea nola egokituko ginen. Gurutzea, bandera eta kandelen atzean,
eta Ama Birjina eta txistularien aurrean sartu zen ezpata-dantzarien taldea. Eliza aurretik abiatu, eta

Arrateko Amaren doinuaren erritmora sartu ginen basoan, zubiak egin, gurutzera igo, eta Eibarri aurretik pasatzean, herrira begira jarrita salbea kantatu ostean berriz ere elizaruntz buelta.

Mikel Legorburu min hartuta zegoenez ezpata luzedunen taldean egokitu zen, eta Josu Garatek hartu zuen bere lekua azkendarien artean. Datorren urtean aurten hasitako bukatzera etorriko dela hitz eman digu Mikelek.

Eliza aurrera iritsitakoan, zubiak egin,  azkendariak aurre aldera pasa eta ezpata-dantza eskaini zioten berriz Arrateko
Ama Birjinari. Eliza aurreko ezpata-dantza une berezia da. Ikusle asko
biltzen dira elizaren atarian, eta jendearen berotasuna eta txaloak gain gainean sentitzeko aukera izan genuen.

Zelaira sartu, iriarenaren doinuarekin zelaia gurutzatu, eta Arrateko dantzen errepertorioari heldu genion.

Zintzarria egin, arrosa gainean buruzagia altxatu eta Arrateko Amaren ezpata-dantza. Ondoren karrera azkar bat, ohorezko arkua lau azkendarientzat, eta berriz ere karrera.

Usartza txistulari taldea dotore ari zen jotzen, eta ezpata-dantzaren ondoren trokeo-dantzari heldu genion. Hasteko makila txikiena, eta buruzagi lanetan Jon Lizarralde. Ondoren Abel Iriondok jaso zuen buruzagi makila, eta makila handienaren zortzikoa eta jokoa egin genituen. Azkenik brokel-dantza. Lourdes Odriziolaren buruzagi lanak, taldearen zortzikoa eta jokoa.

Taldea batu berriz, ezpatak jaso eta ospa. Bukatu zen 2006eko Arrateko dantzen emanaldia. Bazkaria Krabelinen, eta bazkalostean, Arrateko Amaren dantzarien kofradiaren akta irakurri, gonbidatuei eskerrak eman eta liburuan sinatuta borobildu genuen eguna.

Prentsak ere nahiko hurbiletik jarraitu ditu Arrateko Amaren dantzen gorabeherak. DVko Felix Morquecho ensaiora ere etorri zen Arratera, eta emanaldiaren biharamunean ere argazki ederrak argitaratu zituen. Hori bai, gustora geratu den Indixua da, DVko portadan atera zioten argazkiarekin. El Correoko Begoña Alkortak ere interesa erakutsi du, Noticias de Gipuzkoako Jabi Leon ere primeran portatu da, Etakitto bezala, eta milagro, Berrian ere izan dute aipamen bat gure dantzek, argazki eta guzti!

Felipe Loyola, Arantza Uriguen eta Julene Usobiagak ateratako argazki sorta hemen ikus dezakezue.

Datorren urtean berriz.

Ia
dena prest dago ostiralean Arraten egingo dugun emanaldirako. Aste
honetan azken prestaketetan ari gara, gaur, asteazken iluntzean
Arraten bertan egingo da ensaioa nagusia. Iaz abiatu zen tradizioa
sustraitzen
hasi eta dantzen errepertorioa osatzen jarraitzeko asmoa du aurten
Kezka dantza
taldeak.

Flandrian
estreinatutako bi dantza berri

Iaz
bi dantza estreinatu ziren, ezpata-dantza eta makila txikiena. Aurten, bi
horiez gain, beste bi dantza estreinatuko dira Arrateko zelaian: makila handien
dantza eta brokelen dantza. Bi dantza berri horien doinuak Jose Miguel
Laskurain txistulariak prestatu ditu, eta Usartza txistulari taldea arduratuko da jotzeaz.

Bitxia
bada ere bi dantza berri horiek Flandrian, Beljikan aurre-estreinatu ditu Kezka
dantza taldeak. Arraten aurkeztu aurretik aurre-estreinu bat egin nahi izaten
du Kezkak, Arrateko zitara dantzak behar bezala prestatuta eraman ahal izateko.
Dena prest zegoen Eibarko Dantzari egunean, ekainaren 16an, bi dantza berriak
lehen aldiz jende aurrean aurkezteko, baina emanaldia hasi behar zen ordu
berean eroritako eurite izugarriaren ondorioz bertan behera geratu zen
ekitaldia. Ondorioz, aurten Sint-Niklaas-en parte hartu duen jaialdian eskaini
zituen Kezkak lehen aldiz Arrateko bi dantza berri horiek.

Aurtengo gonbidatu bereziak

Iazko
estreinaldian Arrateko Amaren dantzarien kofradia sortu zuten dantza saioan
parte hartu zuten dantzariek. Kofradia horretako kideak dira Arraten irailaren
8an dantza egiten dutenak eta urtero Eibartik kanpoko zenbait dantzari
gonbidatuko ditu kofradiak emanaldian parte hartu eta Arrateko Amaren
dantzarien kofradiako ohorezko kide izatera. Iaz bi dantzari eta dantza-maisu
bikain izan ziren gonbidatuak: Mikel Sarriegi beasaindarra eta Iñaki Arregi
andoaindarra.

Aurten
Elgoibarko lau dantzari dira Arrateko Amaren kofradiaren gonbidapena jaso
dutenak. Eibarko dantzarien ibilbidean ezinbesteko laguntza eskaini dute
Elgoibarko Haritz dantzari taldeko lau dantzari horiek, haiekin ikasi dituzte
gaur egun egiten dituzten dantza gehienak eta dantzari bikainak direla erakutsi
dute hainbat urtetan han eta hemen egindako emanaldietan. Hauek dira aurten
Arrateko dantzetan izango ditugun lau gonbidatu bereziak: Jon Lizarralde, Abel
Iriondo, Lourdes Odriozola eta Mikel Legorburu.

Lau
gonbidatuak protagonista izango dira ezpata-dantzan, beraiek beteko baitituzte
bakarlari lanak eta zelaian egingo diren trokeo-dantzetan buruzagi edo kapitain
dantzak egingo dituzte. Horretarako prestatzen aritu dira azken hilabeteetan,
Arrateko ezpata-dantza ikasten aritu baitira Josu Garaten eskutik.

Tamalez, 
Mikel Legorburu min hartuta dago, eta beraz aurten ezingo du
bakarlari  lanetan aritu. Hala ere ezpata luzearekin arituko da
aurten, eta datorren urtean, osatuta dagoenean etorriko da berriz
Arratera  ezpata txikiekin  duen konpromezua kitatzeko. Josu
Garate arituko da  bere tokian, Aiert  Ibarbiak  egingo
ditugu  maisu-zahar lanak ezpata luzeak batuz.  Guztira, 34
dantzarik parte hartuko dute  Arrateko  ezpata-dantzan.

Arrateko Amaren dantzak – ordutegia

Irailaren 8an, ostiralean, Arraten

11.00etan elizan, Meza Nagusian, ezpata-dantza.
12.00etan prozesio bukaera elizaren atarian
ezpata-dantza.
12.30etan zelaian:

• Arrateko Amaren
  ezpata-dantza
• Arrateko Amaren
  trokeo-dantzak:
• Makila txikien
  dantza
• Makila handien
  dantza
• Brokel-dantza

Pasa dira aste batzuk Flandriatik itzuli ginenetik, baina abuztua
tartean eta argazkiak bildu, aukeratu eta sareratu orduko iraileko
lehen astea ia joan zaigu. Zaila da blogeko sarrera batean
Sint-Niklaas-en pasa dugun astebete intentsoak utzitako arrasto guztiak
biltzea, baina saiatuko gara koadro inpresionista bat egiten.


Abuztuaren
13tik 19ra bitartean burutu da Volkskundstweek 2006 Nazioarteko
Folklore Jaialdia Sint-Niklaasen. Dantzaz betetako astea izan da, egunero
emanaldi bat edo bi eskaini ditugu. Beraz, nekatuta, baina aldi berean hunkituta itzuli gara, jaialdiaren antolatzaileek eta
beren etxeetako ateak ireki dizkiguten familiek eskainitako harrera beroagatik.

Emanaldiak hirian
bertan, eta inguruko herrietan izan dira. Serbia, Letonia, Eskozia eta
Flandriako taldeekin batera aritu gara dantzan Kezkakoak. Arrateko
dantzak, Durangaldeko dantzari-dantza, Zuberoako dantzak, kaskarots,
soka-dantza, Arratiako jotak
eta beste zenbait dantzaz osatutako emanaldiak
eskaini ditugu Eibartik joandako 37 lagunek. Kezka dantza taldeko
dantzariekin batera, Elgoibarko Haritz dantzari taldeko dantzariek, eta
Kezkako eta Ermuko
txindurri dantza taldeko txistulariek eta Agirrebeña anai-arrebak trikitilariek
osatutako musikari taldeak dute espedizioa.

Abuztuaren
15ean, Andra Mari egunean, Belgikako kostaldean, De Panne hirian
eskaini genuen emanaldia. Abuztuaren 18an berriz, jaialdiko azken
emanaldia Sint-Niklaas-eko Stadschouwburg
antzokian egin zen. Denera, 10 emanaldi eskaini ditugu 7 egunetan,
baina hala ere turismo apur bat egiteko tartea ere izan dugu, izan ere
besteak
beste Brujas, Gante edo Sint-Niklaas bera ezagutzeko aukera izan dugu.

Azpimarratzekoa da beren etxeetan hartu gaituzten familiekin sortutako harremana, eta nola ez, astebete honetan gure gidari eta betiedozertarakoprestzeudenlagunak izan
ditun Bart eta Katrijn-ekin izandakoa. Haien sekretuko ezkontzaren
berri izan eta Antwerpeneko udaletxe aurrean dantzatu genien.
Biharamunean, Sint-Niklaaseko udaletxe plazan bertan, Beljikako plaza
handienean, ezpata-dantzarekin ohoretu genituen ezkonberriak.

Batzuetan antzoki eder eta dotoreetan aritu gara, beste batzuetan
jendez gainezka zeuden areto txikiagoetan. Dantzariak saiatu dira
txispak ateratzen, eta musikariak dotore aritu dira. Arrateko eta
Durangaldeko ezpata-dantzak han eta hemen erakutsi ditugu, eta trukean
Eskoziako ezpata-dantzak eta Flandriako ezpata-dantzak ezagutzeko aukera izan dugu,
aipatzekoa flandriarrek azken egunean makilekin, aro batekin eta danbor
huts batekin egin zuten ezpata-dantza ikusgarria. Gainera, eskoziarrek beren
dantzetan egiten duten Pas de Basque urratsa ikasteko aukera izan
genuen, batzuk Serbiako taldearen dotoreziak harritu gintuen, eta beste batzuk
Letoniako neskekin fitxak sartzen saiatu ziren…


Jaialdiko parte hartzaileeontzat antolatu zen festan beste talde bat
imitatu behar zuen herri bakoitzak, eta guk eskoziarrena egin genuen,
ezpata-dantza, haien gaiteroaren pareko gure Mc’tree gaitero eta guzti. Horren famatua den garagardo
beljikarra dastatzeko aukera izan dugu, Mutik ez du erraz ahaztuko bere
urtebetetzeko ospakizuna -ezta jasotako musu pila ere…-, eta azken
egunean, aste osoan buruan genuen galderak erantzuna izan zuen: Zer
daramate eskoziarrek gona azpian?

• Argazkiak hemen. Gutxi batzuk, milaka argazki atera baitituzte gure produktore bikainek eta aukeratzea ez da lan makala!
• Prentsa ere ondo portatu da eta hona adibide batzuk: 1, 2, 3, 4 eta 5. Belgak ere bai! Ikusi hemen Gazzet Van Antwerpen