Gipuzkoako Urrezko dominen emate ekitaldia entzutetsua izan ohi da eta medioetan jarraipen zabala izaten du. Albisteek ez dute zerikusirik izaten ezpata-dantzarekin (batzuetan Urrezko dominaren ekitaldiarekin ere ez) baina argazkietarako ongi etortzen zaizkie dantzariak (argazkiei kolorea ematen laguntzen die).

Adibidez, El Correok ekonomia eta politikaren inguruko albiste bat ilustratzeko erabili du ekitaldiko argazkia. Las Diputaciones se muestran incapaces de pactar el Impuesto de Sociedades. Eta albistea ilustratuz ezpata-dantzan ateratako argazkia, dantzariak arkua eginda dutela eta Garaikoetxea eta Ibarretxe arkupean sartzen. Urrezko dominak eman direnik ere ez du kontatzen, izan ere, albisteak ez du inolako zerikusirik ekitaldi horrekin.

Beste bi egunkaritan, El Mundon eta El Pais-en agertu dira ezpata-dantzaren argazkiak, baina bietan ere nahiko antzeko moduan. Urrezko dominak jaso zituztenak ageri dira, beraien aurrean ezpata-dantzari bat ageri dela (Gari bietan) dantzan.

Eskumako hau Urrezko Dominen ekitaldiaren biharamunean El Mundon egunkarian argitaratutakoa da, eta azpian dagoena berriz, El Pais-en argitaratu zena.

Harkaitz-en bidez ETBk ekitaldiari buruz eman zuen erreportajearen zati bat lortu dugu. Lehenengo hamar segunduetan ezpata-dantzaren irudi batzuk ageri dira. Ez da beste munduko ezer, baina bideoak sareratzeko aukerak probatzen hasteko ondo datorkigu. “YouTube” sistema erabiliko dugu horretarako, eta egia esan, azkarra, erraza eta erosoa da. Ema Play eta ikusi bideoa.

Bilboko Kafe Antzokiak 10 urte betetzen dituela ospatzeko Juan Antonio Urbeltzek zuzenduta eta Argia, Haritz, Kezka eta Arkaitz dantza taldeen eskutik, Pas de Basque ikuskizuna eskaini genuen larunbatean, abenduaren 17an, Kafe Antzokian
bertan.

Kafe Antzokia biltoki ederra da, hainbat kontzertutarako aproposa, baina zenbait dantza emanalditarako ez da oso erosoa gertatzen. Pas de Basquen 40 dantzari eta dozena erdi musikarik parte hartzen du, eta ondorioz, estu samar ibili ginen zenbait dantzatan. Hala ere, moldaketa batzuek eginda, egokitu ginen eszenatoki eta inguruetara, eta Kafe Antzokiak berezko duen giro goxoak kutsatuta gozatu genuen Pas de Basque bertan eginez.

Josu oraindik ez da errekuperatu azaroan Euskalduna Jauregian doinu zahar bat dantzatzen ari zela egin zuen lesiotik. Izterrean egin zuen zuntz haustura eta ordutik dantza egin ezinda dago. Urte-berrirako edo berriz martxan izango dela espero dugu. Dantza egin ezinik, publiko artean eserita eta argazkilari lanetan aritu zen Josu. Larunbatean bertak, Kafe Antzokian Josuk ateratakoak dira hemen ikus daitezkeen argazki hauek. Mobituta dauden argazkiei artistikoak esan zaie, eta egia esan, batzuk halakoak dira, buhame honek hartu zuen kaskarrekoa modukoak.

Azaroak 30, San Andres eguna Eibarren. Gero eta zailago gertatzen da asteburukoak ez diren jaietan jendea elkartu eta jaia festa bihurtzen. Bata kanpoan lanean, beste unibertsitatean ikasten, eta Eibarko enpresa batzuk ere lanean… Eskerrak ikasleek obediente izaten jarraitzen duten, batez ere jai egiteko denean.

1993an jarri zen martxan Plazara Dantzara Eibarren. Elgoibarko Haritz eta Debako Gure-Kai dantzari taldeekin harremanetan hasi berri ginen, eta hiru taldeek elkarrekin heldu genion neguko erromeria zirkuitoari.

Urte askotan larunbatetan egin izan dugu Plazara Dantzara Eibarren, baina azken urteotan bere egun naturalera itzuli da erromeria, San Andres egunera. Ondorioz Elgoibar eta Debako lagunak ezin etorri, baina herriko giroa aproposagoa izaten da eta San Andres asteburuan tokatu arte izango gara denok berriz elkartzeko zain.

Jainaga eta Narbaizaren trikitixaren doinuetara, eta talo jateko gose piskat egiteko asmoz, hor ibili gara aurten ere fandango, arin-arin, bals, korrido, kalejira, kontra-dantza edo mazurkak dantzatuz.

Euria ez da urruti ibili aurten ere. 2005ean marka ederra daramagu euriarekin. 2006a hobea izango al da, eguraldi kontuetan besterik ez bada!