Hileko artxiboak: ekaina 2005

Bero-bero Dantzari Egunean

Utzi erantzuna

Meteorologoek iragarri bezala eguzkiak errukirik gabe jo zuen larunbatean. Eibar futbol taldearen azken partida erabakigarriarekin ez bat egiteko eguerdian egin genuen Eibarko Dantzari eguneko saioa, eguzki galdatan zegoen Untzaga plazan.

Plazako beroa bera gutxi balitz, Jainaga trikitilaria etxetik etorri zen bero-bero, gaixorik eta sukarrarekin. Goizean altxatu zenean zuzenean ospitalera joan beharrean Untzaga plazara etorri zen, dantza saioan soinua jotzera. Eguzkia erasoka, bere burua gaixorik, baina hala ere, bukaerarte eutsi zion Adolfok, eta denok jarri gintuen dantzan bere soinuarekin. Gero korrika ospitalera. Eskerrikasko Adolfo!

Kezkako txistulariek ere serio demonio jardun zuten lanean. Azken bi asteak gogorrak eta bete-beteak izan dira beraientzat. Aspaldiko urteetako errepertorio luze eta konplexuena egokitu zitzaien, eta tartean Jose Miguel Laskuraienek Arrateko Amaren dantzetarako prestatutako doinuak. Ez da erronka makala izan. Azken asteotan urduritasunak eta presak agertu dira, baina azkenean fin-fin borobildu dute saioa Andoni, Barua eta Felixek. Eskerrikasko hirukote!!

Hasteko, inude eta artzaiak

Kezka dantza eskolako talde bakoitzak 5-10 minutuko dantza saioa eskaini du. Guztira 100 ikaslek parte hartu dute dantza saioan. Ikasturtean egindako lana erakusteko aukera izan dute eskolako ikasleek. Gipuzkoa, Bizkaia eta Nafarroako dantzak nabarmendu dira aurtengo emanaldian. Hona Eibarko Dantzari egunean eskaini den dantza-egitaraua:

  • Inude eta Artzaiak
  • Nafarroa Behereko inauteriak
  • Kaskarots
  • Durangaldeko dantzari-dantza
  • Irri-dantzak
  • Gipuzkoako dantzak
  • Neskatxen esku-dantza
  • Arrateko Amaren dantzak
  • Zazpi jauzi

Arrateko dantzak

Arrateko Amaren dantzen aurrestreinua ere egin dugu noski. Beroa, nerbioak ere bai, baina oro har aurreikusi bezala atera zen emanaldia. Ikusleen aldetik harrera beroa izan duela esan liteke. Hotza izateko baldintzarik ez zegoen behintzat.

Ezpata-dantza eta makila txiki dantza aurkeztu ditugu. Horiek dira aurtengo Arrateko Amaren egunean dantzatuko ditugunak. Hemendik irailera bitartean dantza horiek finkatu, zuzenketa batzuk egin, eta atseden hartzeko astia dugu.

Baina oporrak hartu aurretik baditugu beste lan batzuk. Adibidez, datorren ostiralean, ekainak 24, San Joan eguna eta beraz, soka-dantza Eibarren.

Eibarko Dantzari Eguneko argazki gehiago Kezka dantza taldeak flickr gunean duen txokoan aurki ditzakezue. Egin klik hemen eta hor ikusiko dituzue.

Arrateko dantzak Dantzari Egunean

2 erantzun

Arrate egunerako prestatzen ari garen dantzen aurrestreinua egingo dugu larunbat honetan ospatzen duen Eibarko Dantzari Egunean. Irailaren 8an, Arraten izango dute dantza hauek estreinaldi ofiziala, baina Arratera iritsi orduko dantzak ondo prestatuta daudela ziurtatzeko Dantzari Egunean, Untzaga plazan, egingo da jendaurreko lehen saioa. Arrateko dantzen errepertorioa osatuko dutenen artetik bi dantza estreinatuko dira larunbatean: Arrateko ezpata-dantza eta makila txikien dantza.

Jantziak

Jantziak prestatzen gogor jardun dute azken hilabeteotan jostunek eta dagoeneko prest daude Arrateko Amaren dantzariek erabiliko dituzten arropak. Aurkezpenean azaldu zen bezala kolore zuria eta apaingarri gorriak izango dira osagai nagusiak, eta ezaugarri berezi nagusia gona motza izango dute. Ezaugarri horiek guztiak zituen Juan Antonio Urbeltz-ek 1988an Zortziko ikuskizunerako prestatu zuen diseinuak eta horixe aukeratu dugu Arrateko amaren dantzarien uniforme izateko.

Musika

Arrateko dantza horietarako musika Jose Miguel Laskurain, Usartza Udalaren Txistulari Taldeko kideak prestatu du. Inguruko dantza tradizioetako doinuak, XVI eta XVII. mendeetako dantza doinuak, Eibarko doinuak eta beste zenbait material erabili ditu Arrateko ezpata-dantza eta makila-dantzaren musika prestatzeko. Kezka Dantza Taldeko txistulariek joko dituzte doinu horiek Dantzari Egunean, eta Usartza Udalaren Txistulari Taldeak joko ditu Arrate egunean.

Koreografia

Gipuzkoako ezpata-dantza tradizionaletik abiatuta Markina, Deba, Legazpia, Oñati eta Eibarren inguruko herrietako dantza tradizioetan oinarrituta osatu da Arrateko ezpata-dantza. 24 dantzarik osatuko dute ezpata luzeekin jardungo dutenen taldea eta bi eskuko ezpatak (mandoble izenekoak) erabiliko dituzte, 130 zmko luzera dutenak. Lau dantzarik ezpata txikiekin dantzatuko dute.

Neska-mutilak

Arrateko Amaren dantzek izango duten ezaugarrietako bat genero bereizketarik gabeko dantza tradizionalak izango direla da. Dantza tradizionaletan oso markatua izaten da genero bereizketa eta gizon eta emakumeek ondo zehaztutako rolak betetzen dituzte. Arrateko dantzak XXI. mendean sortuak diren aldetik gaur egungo gizarteko moduetan oinarritutakoak izango dira eta neska eta mutilek berdin osatuko dute dantzari taldea, bereizketarik gabe.

Eguerdian (12.30tan) egingo da Dantzari Eguna Untzagan

Larunbatean, ekainaren 18an, arratsalderako aurreikusita zegoen Dantzari Eguna, baina Eibar futbol taldeak lehen maila igotzeko azken partida ordu berean jokatuko duela ikusita eguerdian, 12.30etan ospatuko dugu Dantzari Eguna Untzaga Plazan.

130 dantzari

Kezka Dantza Taldeko 30 dantzariekin batera Kezka dantza eskolako 100 ikasleek parte hartuko dute Eibarko Dantzari Egunean. Urtean zehar ikasi eta landutako dantzak erakutsiko dituzte. Donostiako inauterietako Inude eta Artzaien konpartsarekin hasi eta Nafarroa Beherako inauteriak, Kaskarots, Durangaldeko dantzari-dantza, Nafarroako irri-dantzak, Gipuzkoako dantzak, Neskatxen esku-dantza eta emanaldia borobiltzeko Arrateko Amaren dantzak eskainiko dira emanaldian. Dantzari guztiek batera egingo duten zazpi-jauzirekin bukatuko da dantza-saioa.

Musika

Andoni Altzibar, Felix Elortza eta Iñaki Barua, Kezkako txistulariak izango dira musikaren ardura izango dutenak, eta horiekin batera Jainaga eta Narbaiza trikitilariak arituko dira dantza bakoitzari doinua jartzen.

  • Dantzari Eguna
  • Ekainak 18, larunbata
  • 12.30etan Untzaga Plazan