Zizurkilgo Pas de Basquen ingurutxotik kanpo geratu nintzen (dantzari gazteak gogor datoz) eta argazki batzuk egiteko aukera izan nuen. Banbalina artetik flashak botatzea zatarra da, eta beraz, flashik gabe egin nituen, eta aukeran, kolore aldetik hobeto.
Hemen Ane eta Irati.
Hemen berriz Lohitzune eta Ekhi.
Argazki taldekoa banintz azken hau artistikoa dela esango genuke. Baina dantza taldekoa naizenez mobiduta atera zaidala esango du norbaitek.
Atzo ezpata-dantza egin genuen Donostian. Gipuzkoako urrezko domina ematen zien Foru Aldundiak Menchu Gal margolariari eta kooperatiben sortzaileei. Aurrean bezala Urbeltzi eskatu zioten omenduei egiteko harrera dantza prestatzeko eta Urbeltzek ezpata-dantza egitea proposatu zigun. Nahikoa lan izan dugu taldea osatzen ostegun buruzuri batean eta goizeko 11.00etan ez baita erraza dantzari talde bat biltzea. Azkenean domina bezala, ezpata-dantza ia Gipuzkoa osokoa atera zaigu: Hondarribia, Irun, Añorga, Deba, Elgoibar, Eibar eta Ermuko (Bizkaiko ordezkaritza) dantzariekin osatu dugu ezpata-dantza. Elgoibarko Udalaren txistularien doinura dantzatu dugu. Ea hurrengoan larunbatean egiten duten bestela… Hona argazkiak.
Datozen bi asteburuetan Pas de Basque ikuskizunaren bi emanaldi ditugu. Argia dantza taldearekin, eta Elgoibarko Haritz eta Añorgako Arkaitz taldeekin parte hartzen dugu Juan Antonio Urbeltz-ek gidatzen duen ikuskizunean.
