Larunbatez igo gara aurtengoan Arrateko gainera, eguzki betearekin, elkarri ezpata emanda zelaia hartzeko prest.

Aterpetxean prestaketa lanak eta tradizioaren lehenengo urratsa den argazkia ―58 ezpata-dantzari aurten― aterata, eliza barruan dantzatu genuen lehenengo, meza nagusian zehar. Bertan estreinatu ziren Iker Gil eta Keltze Iturralde, Portugaleteko Elai-Alai dantza taldeko lagunak eta eskarmentu handiko dantzariak.

Jarraian, Arrateko ama prozesioan atera zen gure atzetik eta herritar ugarik lagunduta egin genuen gurutzerainoko joan-etorria. Aurten, izan dira Keltze eta Ikerrez gain bide hori gurekin egin duten bestelako partaide batzuk, izan ere, Arrate gainera bizitzera iritsi berri diren mojek, lehenengoz ikusi zituzten, ziurrenik, prozesioa eta gure dantzak.

Hala, eliza parera iritsitakoan, ezpata txikiek, berriek zein arituek, Gipuzkoako ezpata-dantza eta Arratekoa eskaini zizkioten Eibartar guztion amari. Keltze eta Ikerrekin batera, Luken Aranburu eta Eider Agirrebeña agertu ziren amabirjinaren aurrera.

Atseden txiki bat hartu genuen orduan, luzaketa lanak egin eta zelairako saltoa prestatzeko. Josu Garatek gidatutako taldea Arrateko zelaian sartu zen, herritar artean eta eguzkipean dantzatzera. Ezpata txikietara batu ziren, Miren Hazas, Egoitz Blanco, Jone Lahidalga eta Ander Garitagoitia eta, estreinako aldiekin jarraitzeko, Ainhoa Larrañaga aipatu behar dugu oraingoan, izan ere, Kezka dantza taldean eskarmentu gehien duen dantzaria ahaztu gabe, lehen aldia izan zuen Ainhoak parrila gainean eta elegante eutsi zion erronkari. Bejon deizula, Larra!

Trokeo dantzen txanda etorri zen gero eta orduan ere fin aritu ziren  Keltze eta Ikerrek egindako lana erakutsi zuten, Makil-txikien eta Brokel-makilen zortzikoetan, hurrenez hurren eta Luken izan zen Makil-handienari sarrera eman ziona.

Behin lanak bukatutakoan, ondo merezitako dutxa hartu eta Tiro pitxoiko jangelara hurreratu ginen denak, eguna borobiltzera. Enrike Izagirrek ohi duen bezain apain jantzi zuen egunaren kronika eta Oier Araolazak hartu zuen hitza jarraian. Gogoan izan genuen aurten utzi gaituen Marian Arregi, kantuan, eta txalo artean eta ongi etorria eman genien kofradiako kideen artera batu zaizkigun dantzari bizkaitarrei. Era berean, aipamen berezia jaso zuten Ane Sarasketak eta Aiert Ibarbiak, hamargarrenez jantzi baitute Arrateko amaren domina. Batzuk zein besteek, etxera eraman dute Arrateko amarekin lotuko dituen domina, hurrengoetan ere nahi izanez gero etortzeko edo etortzen jarraitzeko gonbitarekin batera.

Denoi ere, datorren urtera arte!

Hona hemen egunak utzitako argazki gehiago,

Urte guztiko lana erakusteko unea iristen zaie Kezka taldeko dantza eskolako ikasleei San Joan aurreko azken ostiralean. Aurten ekainaren 15a izan da egun hori eta taldeko gaztetxoek ederto erakutsi zituzten bereganatutako abileziak Untzaga plazan.

Hango eta hemengo dantza ezberdinak erakutsi dituzte kantu, giza-dorre eta jokoz lagunduta. Hasierako urduritasunak kenduta irribarreak izaten dira nagusi dantzarion jai honetan eta horiek izan dira aurten ere protagonista.

2008an jaiotakoen irribarreak izan ziren plaza hartzen lehenak. Idoia Lahidalga irakaslearekin landutako Sarian-Zunzun egin zuten, dantza eta kantua.

Maider Otaolaren taldeak jarraitu zuen dantzan. Hauek Abaltzisketako eta Lizartzako inauteri-dantzak egin zituzten koloreta zapaietan bilduta.

2011ko txikiek Olagueko esku-dantza eta Buhameak eta Marmutx dantza-jauziak eskeini zituzten beraien lehen dantzari egunean. Amaia Visus irakaslearen landutako guztia primeran dantzatu zuten!

Kostaldeko dantzak egin zituzten 2009an jaiotakoek. Miren Hazasen taldeak arropa urdinak jantzita Kaskarots, Saliña-saliña eta fandangoa eskaini zizkiguten, dantza alaiak, neska-mutiko alaiek eskainiak.

Oriako sorgin-dantza izan zen plaza hartzen hurrena. 2003ko gazteek Amaia Rodriguez eta Maider Otaola irakasleekin landutako dantza barregarria egin zuten, irribarrea, oriangoan, ikuslearengan eraginda.

Gipuzkoatik Arabara salto egin zuten dantzariek gero. Arabako Eltziego herrira hain zuzen ere. Amaia Visus eta Jone Lahidalga irakasleen esanetara ikasitako Bailaos eta El Culo makil-dantzak egin zituzten, gaiteroek lagunduta.

Eta Gipuzkoara bueltan etorri ginen berriro Amaia Rodriguezen taldearekin. 2005ean jaiotako neskek Makil-txiki eta Zinta-dantza egin zituzten, eta baita ondo gauzatu ere!

2007koek, orain arte Untzagan ikusi gabe genuen dantza plazaratu zuten arropa ezin ederragoekin. Biarritzeko San Martin ezpata-dantzaren parte den arku-dantza hain zuizen ere. Leire Andikoetxea eta Amaia Visus irakasleak aritu ziten dantzari txikiekin lanean eta emaitza ikusgarria izan zen.

Nagusion txanda iritsi aurretik, aurreakoaren aurrean klasikoak diren dantzak egin zituzten 2004 eta 2005eko neska-mutilek; Durangaldeko Dantzari-dantzako Agintariena, Zortzinangoa, Ezpata-joko nagusia, Binanoa eta Txotxongilo. ander Garitagoitia aritu da hauekin lanean.

Dantza eskolako dantzari txikiek beraien lanak amaituta nagusiek hartu zuten plaza eta Lapurdi aldera eraman zuten ikuslea, Martxa, Makil-txiki, Marmutx, Antxoriz, Betteluren Lapurdiko fandangoa eta dantza-luzea eskaini zituzten.

Azken horretan, gaztetxoak ere sartuta utzi zuten dantzari guztiek plaza, hasierako irribarre lotsatiak lasaituta eta datorren urterako indarrak hartzeko prest.

Ezin aipatu gabe utzi gure dantzei musika jartzen aritu zen musikari sorta zabal eta anitza, mila esker!

Lotura honetan ikusi daitezke 2018ko dantzari eguneko argazki gehiago:

Laugarrenez sartu ginen elkarri estu helduta eta korrika betean Untzagako plazara, Jainaga eta Narbaizak beraien lanak bukatu ondoren.

Erromerian jauzika ibili ziren zenbait lagun eta haiek utzitako lekua bete zuen gure soka zuri-gorriak lasterka.

Luken Aranburu aurreskuak egin zuen tira eta Eider Agirrebeña izan zen azkena plazan sartzen, atzesku gisa. Buruz-buru desafio ederra egin ondoren, abarketen doinuarekin sokako kideek binaka edo hirunaka jardun genuen, norbere honenak ematen.

Jarraian, San Joan zortzikoarekin, aurreskua eta atzeskua txandaka jardun ziren dantzan eta dagoeneko ohitura bihurtzen ari den dantzan, dantzari guztiek batera egin genuen jauzi.

2018ko honetan, Eibarko Club Deportiboko bi atleta izan ziren omenduak, Pello Osoro triatoilaria batetik eta Odei Jainaga xabalina jaurtilaria bestetik. Irribarrez hartu zuten omenaldia eta elegante aritu ziren fandango eta arin-arinean ere, zorionak bioi egindako denboraldi borobilarengatik!

Bukatzeko, dantzari eta atleta, denak batera kalejiran irten ginen plazatik, su artifizialei lekua uzteko.

Argazki gehiago ikusi nahi izanez gero, egin klik hemen:

Aurtengoan dantzari ugari etorri zaizkigu Araba, Nafaroa, Tarragoa eta Zaragozako lurretatik eta Kezkakook lagun izan ditugu erakustaldi honetan. Guztion artean, Andoain, Aduna, Verantevilla, Tauste, Tarragona eta Erriberako dantza eta giza-dorreak plazaratu genituen Untzagara bildu zirenek ikusteko.

Kezkako dantzariak izan ginen plaza hartzen lehenak eta San Juan egunean Andoainen eta Andra Mari egunean Adunan egiten den axeri-dantzaren zati batzuk egin genituen.

Blusa zabalek eta kezkako dantzari guztion presentziak gorritu zuen plaza bat-batean, haur, gazte eta heldu, elkarri helduta dantzan ibili ginen, eta segidan ikusiko dituzuen argazkietan ageri dira dantza osatzen duten paseoa, axeri-dantza, orratzarena, ilentiarena, perratzearena, giza-dorrea eta plaza husteko kalejira.

Beti egin ohi duten legez, txalo zaparrada handiarekin agurtu gintuzten herritarrek, mila esker dantzan, musika jartzen edo txalo jotzen parte hartu zenuten guztioi eta, bereziki Ezpalak jaialdia antolatzen urte osoko lana egin duzuenoi!

Jaialdiko argazki gehiago ikusteko gogoz bazara, egin klik hemen:

Irailaren 8a Larunbatez dator aurten. Egin ditugu azken entseguak, baita Arraten ere entsegu bustia, eta dena prest 2018ko Arrateko Amaren dantzetarako. Aurtengo gonbidatuek ere probatu dute Arrateko zelaiko berdea, larunbatean akaso marroiago egongo bada ere. Portugaleteko Elai-Alaiko bide dantzari, Iker Gil eta Keltze de Iturrate izango dira aurtengo gonbidatuak, ezpata-dantza aldare aurrean dantza egingo dutenak.

Arrateko dantzak, irailak 8, ostirala

• 11:00etako mezan ezpata-dantza.
• 12:00ak aldera hasten den prozesioaren bukaeran ezpata-dantza.
• 12:30etatik aurrera, ezpata-dantza eta trokeo-dantzak zelaian.

Irailaren 9an, Biarritzen, Martin Zalakain

Biharamunean, irailaren 9an, Biarritzen izango gara. Argia, Artedramak eta Martin Zalakain ikuskizunaren troupe osoa Biarritzeko Maitaldia jaialdian izango gara. Gare du Midi antzokian gaueko 21:00etan hasiko da Pio Barojaren nobelaz Juan Antonio Urbeltzek ideiatu eta koreografiatu eta Ander Lipusek eszenaratu duten bertsioa.

Uda eta opor aroa hastearekin batera Euskal Herriko txoko guztietako dantzariok kanporako bidea hartzen dugu askotan, nazioarteko folklore jaialdiek goxoki ederra jartzen digute aurrean eta ezin ezetzik esan. Kezka Dantza taldekoak Frantzia aldera joango gara aurten, Castelmoron sur Lot herriko Les Folkloriades jaialdira.

17. edizioa izango da aurtengoa eta Kolonbia, Serbia, Kirgizistan, Niger eta Euskal Herriko dantzariak batuko gara uztailaren 20 eta 22 arteko asteburuan ospatuko den festan.

Akitanian kokatzen den herria da Castelmoron sur Lot, ez da 1800 biztanletara iristen urtean zehar baina jaialdia iristerekin batera jendetza batzen da herriko kaleetan handik eta hemendik etorritako dantza eta musika talde ezberdinak ikusteko. Euskal Herritik Arrate egunez Eibarren egiten ditugun trokeo dantzak eta San Juan gaueko soka-dantzaz gain Zuberoako dantzak ere eramango ditugu Akitania aldera.

Ostiralean, larunbatean eta igandean eskainiko ditugu emanaldiak Folkloriades jaialdian, lau guztira, larunbatean birritan dantzatuko baitugu oholtza gainean.

Maiatza eta ekaina lan hilabeteak izaten dira dantzariontzat, Eibarko Euskal Jaia, Ezpalak jaialdia, Eibarko Dantzari Eguna eta San Joan jaietako dantzaldiak gainean izaten ditugu eta urte guztian landutakoa erakusteko desiatzen egoten gara hilabete hasieratik. Maiatzeko lehen egunekin hasten gara baina han eta hemen dantzan. Aurten ere, maiatzeko lehen igandean bertan herriko bi txokotan, aldi berean, aritu baitziren Kezkako zenbait dantzari.

Santa Kurutzeko Ermita izan zen lehen lekua. Bertako jaiak ospatzen zirela eta soka-dantza ederra plazaratu zuten Ane Muguruza, Idoia Lahidalga, Irati Larruskain eta Ane Montielek auzoko lagunekin batera. Lehena aritu zen aurresku lanetan eta bigarrena, aldiz, atzezkuarenetan. Larruskain eta Montiel izan ziren zerbitzariak. Igandeko meza ostean giro ederrean egiten da urtero soka-dantza santa Kurutzeko ermitan eta auzokoek beti eskuzabal eta gogotsu hartzen gaituzte. Kalejiraren ostean ere festak ez du etenik izaten ermita inguruan. Aurtengoan, ordea, ohikoa ez dena ere gertatu zen, behingoagatik txapelek ez zuten teilatu gainean amaitu!

Herriko goi aldeetatik behe aldera salto eginda Urkizuko parkeak hartu zuen Kezkakoen bigarren dantzaldia. Taldeko gaztetxoen bertan ospatzen ziren Letra Galegoen festan Oriako sorgin-dantza plazaratu zuten. Gona gorri eta txapel luzedun dantzariek barre ugari eragin zituzten bertaratutakoen artean, muxu, besarkada eta tiro artean.

Hona Amaia Rodriguez, Jone Lahidalga eta Olaiz Agirrebeñak Santa Kurutzen eta Urkizun ateratako argazkiak:

Gaur argitaratzen den …eta kitto! aldizkaria, 1055. zenbakia daramana gure artxiboan ongi gordetzekoa da. Azaletik hasita azken orrialderarte hainbat aldiz ageri da Kezka dantza taldea bertan. Hasteko, azalean bertan, …eta kitto!-ren sorreraren 25. urteurrena ospatzeko egindako jaialdiko argazkian ageri dira Kezkako dantzariak, ekitaldiko aurkezlearekin batera euskara elkartearen alde topa egiten.

5. orrialdean Santa Kurutz jaiei buruz artikuluaren argazkian, soka-dantzan ageri dira Kezkako dantzariak.

9. orrialdean …eta kitto!-ren 25. urteurrenean egindako dantza ekitaldiko zenbait argazkitan ageri gara Kezkako dantzariak.

12. orrialdean ekitaldiko ikusle eta parte hartzaileen argazkiak batzen dira, eta tartean badira Kezkako dantzariak ere.

15. orrialdean, Aitor Gorosabel eta Eibarko Koro Gazteak eskainitako kantuan, EKG eta Kezkan aritzen diren Jone eta Idoia Lahidalga dantzari-kantari ikus daitezke.

36. orrialdean, Dantzaz konpainiako Fernando Saenz de Ugartek aipatzen du Kezka dantza taldea, Dantzaz-ekin egingo den topaketa dela eta.

37. orrialdean, Martin Zalakain ikuskizunerako sarrerak salgai daudela aipatzen da.

38. orrialdean, gaur ostirala, Juanita Unzuetan omenezko dantza jaialdian Coliseoan dantzatuko dutenen artean aipatzen da Kezka dantza taldea.

Normalean oso ondo tratatzen gaituzte …eta kitto!-n, baina oraingoa kasualitatea izan da, e!!! Ez ditugu mehatxatu!! 😉

Otsailaren 3an San Blas eguna ospatzen da Eibarren, baina 2018 honetan inauteriak gertu tokatu zaizkio San Blasi eta Koko-dantzak egun horretan bertan egin genituen. Agina eta Mandiola inguruko baserriak bisitatu genituen goizean goizetik hasita eta arratsaldean, aldiz, Eibarko kaleetan barrena aritu ginen dantzan eta kantuan.

8:30ean merkatu plazan hasita beste 22 baserritan izan ginen koko-eskean. Bi taldetan banatuta osatu genuen ibilbide guztia eta baserri guztietan jaso genuen dantza eta kantuen trukeko esker ona.

Urtero bezela ezin hobeto portatu zaizkigu inguruetako baserritarrak eta berriro ere eskerrik asko porru, gazta, untxi, intxaur, salda, txorizo eta San Blasengatik!

Talde batek Agina aldera egin zuen oinez. Inguruan Altzerreka, Altzerreka berri, San Roman, Torrepe, Suinaga, Gorostiaga, Atxekoa, Orbesoraen, Arandoiturralde eta Agiñagainekua baserriak bisitatu genituen. Eguraldiak nahiko ondo eutsi zion goizari eta bi taldeek gehiegi busti gabe osatu genuen ibilibide osoa.

Furgonetetan ekin zion taldearen beste erdiak. Zozolan hasita, Zozolabarri, Miraflores, Milatxori, Milatxori-atzekoa, Asola-aldea, Amezabalegiabeletxea, Oregizahar, Arandobarrena, Arandoguena eta Arandoetxebarri baserrietatik pasa ziren, oinezko taldearekin Agiñagainekuak elkartu arte. Aurretik ere, Orbesoraen etxean talde guztia batu eta Kokomarruen soka-dantza egiteko aukera izan genuen atarian.

Bazkal ordurako bukatu genituen baserri inguruetako lanak eta beheranzko bideari ekin genion. Bapo bazkalduta, atseden hartu eta Eibarko kaleak girotzeko prestatu ginen berriro. 19:00ak aldera Mausitxarekin, Elgoibarko txarangarekin, batu eta Zuloagatarren, Toribio Etxebarria, Untzaga, Kalberton eta Plaza Barrian aritu ginen dantzan. Arratsaldean egunaldiak ez zuen goizean adinako errespeturik izan eta aterpetik aterpera ibili ginen. Untzagan plazako karpan egin genuen berriz Kokomarruen Soka-dantza.

Eguna blai eta nekatuta bukatu genuen bai, baina gozatua hartu eta gero! Hauxe Karnabala!!

Felipe Loioklak, Iñaki Zugastik eta Fernando Retolazak ateratako argazki sorta ederra ikusi nahi baduzu, egin klik hemen: