Gaur goizean Oianguko zelaietan (Ordizian) ospatu da Txindoki Krosa, aurten 2025 urteko Gipuzkoako Kros Txapelketa ere bazena. Eguraldi ona lagun eta espero zena baino lokatz gutxiagorekin, goi mailako lasterketa bizi eta ikusgarria izan da. Bertan, Deporreko ordezkarien partaidetza arrakastatsua izan dugu.
CD Eibar atletismo taldeko Julen Teran izan da irabazlea, 6.350 metro, hiru itzuli handi eta bat txiki, zituen ibilbidea 19:57 minututan egin ostean. Horrela, atleta eibartarrak iaz Arraten irabazitako titulua berretsi du, eta erakutsi du krosaren aditu sendoa dela. Bigarren postuan AZK ETA AZP XEYE Atletismo taldeko Bingen Arambarri helmugaratu da, 20:12 minuturekin, eta hirugarren izan da Goierri Garaia taldeko Imanol Inza (20:17). Proba berdinean, CD Eibar atletismo taldeko Txomin Osoro-k 8. postu txalogarria eskuratu du, 21:23 denborarekin.
Eibarko atletek emaitza bikainak lortu dituzte oro har. Master mailako CD Eibar taldeak Gipuzkoako azpi-txapeldun titulua eskuratu du, Atletico San Sebastian taldearen atzetik eta Goierri Garaiaren aurretik. Master taldea honako atletek osatu dute: Iñigo Trokaola, 3. postuan sailkatua, Roberto Gartzia, 7. postuan eta Marcos Untzetaberrenetxea, 13. postua helmugan, probarako prestatutako ibilbideak 2.750 metro zituelarik.
Bestetik, emaitza onak lortu dituzte Deporreko gazteenek: Ugaitz Gartzia laugarrena sailkatu da gizonezkoen Sub 20 kategorian, hirugarren sailkatua izan den Super Amara BAT-eko Urko Ibarguen-en denbora berdinarekin (11:53); eta Nora Martinez laugarrena sailkatu da ere bai Sub 18 kategorian emakumezkoetan, hirugarren izan den Real Sociedad taldeko Anne Campanillas-etik oso gertu. Sub 20 zein Sub 18 proba biak 3.830 metro (bi itzuli handi) zituen zirkuituan gauzatu dira.
Atletismo eskolako Jone Hernandez (benjamin kategoria) eskolarren Gipuzkoako txapelketan parte hartu du.
Zorionak guztiei lan bikainagatik eta Julen Teran-i bereziki, Gipuzkoako txapeldun izateagatik berriro!
Argazkiak: EKD, Gabriel Beldarrain, Txindoki Atletismo Taldea.
Deja una respuesta